Xixón acueye esti sábadu el 'Liet Internacional', la Eurovisión de les llingües minoritaries

UVIÉU, 29 de Payares (EUROPA PRESS)

Llaboral Ciudá de la Cultura, en Xixón, acueye esti sábadu, 1 d'avientu, la edición 2012 del Festival Liet, la llamada Eurovisión de les llingües minoritaries, cola participación, en representación d'Asturies, d'Asturiana Mining Company, ganadora del últimu Premiu al Meyor Cantar n'Asturianu.

La Gala entamará a les 21.30 hores, y nella van tomar parte 11 grupos representantes d'otros tantos países o rexones, y les sos llingües propies. Pa favorecer el desarrollu del espectáculu, nun se va permitir la entrada de públicu a partir de les 21.15 hores. Amás, va retresmitise en directo per televisión y Internet al traviés de TPA, según informen los organizadores.

Depués de les ediciones celebraes en Frisia, la zona del territoriu Sami asitiada en Suecia, Bretaña y Friul, ésta ye la primer vez que Liet International se va desarrollase na Península Ibérica.

El comité de selección de la Fundación Liet International y los sos socios, compuestu por espertos en música de Frisia, Asturies y Córcega, foi l'encargáu de facer la selección pa esta novena edición del festival de la canción en llingües minoritares europees. Ente 35 candidatos de 18 minoríes llingüístiques diferentes de toles esquines d'Europa, el comité escoyó los cantares de les cinco bandes o solistes: Brian Ó hEadhra, *Fathainn*, gaélicu escocés (Reinu Uníu); Enkore, *Muxurik muxu*, euskera (País Vascu); Ivan Belosludtsev & 4 Cheber Pios, *Tau Tynyd*, Udmurtiu (Federación Rusa); Lleuwen, *Ar Gouloù Bev*, bretón (Francia); y The Voodoolectric, *Slickermuul*, baxu saxón (Alemaña).

Amás, otres seis bandes clasificáronse pa Liet International Asturies 2012 por ganar un concursu de la canción na so propia llingua. Estes bandes son: Asturiana Mining Company, Premiu al Meyor Cantar 2012, Asturies (España); Inger Karoline Gaup, Sami Grand Prix 2012, Sápmi (Noruega); Yldau, Liet 2012, Frisia (Países Baxos).

Dopu Cena, Liet Corsica 2012, Córcega (Francia); Claudia Crabuzza y Claudio Gabriel Sanna, Suns, Friul (Italia); Jonokognos, Suns, Friul (Italia).

Según espliquen los organizadores, al traviés del comunicáu oficial, Liet International creóse y desarrollóse la primer vez nel 2002 pa dar un escenariu a los grupos contemporáneos que canten nuna llingua minoritaria. En diez años, Liet International subió hasta ser una alternativa multillingüe al festival de la canción Eurovisión, col que caltién una diferencia importante, y ye que ta prohibío cantar n'inglés. El festival organízalu la fundación frisia Liet International, en collaboración estrecha con dellos socios europeos.