Xixón recurrirá la sentencia que anula'l plan del asturianu

   XIXÓN, 14 May. (EUROPA PRESS) -

   La Corporación xixonesa aprobó esti miércoles nel Plenu Municipal, col refugu de Vox y l'astención del PSOE, presentar recursu énte'l Tribunal Cimeru de Xusticia d'Asturies contra la sentencia del Xulgáu de lo Contencioso Alministrativu pol que se declara la nulidá del Plan de Normalización Llingüística.

   El recursu sofítase nun informe pola Fundación Municipal de Cultura (FMC), Educación y Universidá Popular, qu'entiende qu'esti Plan ye un preséu non normativu que marca pautes d'actuación, organización y desenvolvimientu de l'acción tendente a dirixir l'actuación municipal, en visu a dinamizar y entamar acciones de fomentu y protección del usu del asturianu, en cumplimientu de la ordenanza municipal del usu de la llingua asturiana nel ámbitu del conceyu xixonés.

   En contra de la presentación de recursu, la vocera de Vox, Sara Álvarez Rouco, quien interpunxera la impugnación d'esti Plan, llamó l'atención sobro que se basen nun informe de la FMC pa xustificar la conveniencia de recurrir la sentencia "por motivos totalmente ayenos a la llegalidá", sostuvo.

   "La sentencia ye incontestable, ye atayante y dexa bien claro qu'intentaron imponer una norma, un reglamentu, una ordenanza, amarutándola d'un simple plan fechu de llombu de los ciudadanos, como diz la sentencia", afirmó, antes de rellatar delles de les causes que motiven la so nulidá, como la falta de memoria económica.

   Rouco enfeó que se dispongan de recursos de el xixoneses pa "imponer la cooficialidá". Sobre ello, aprofió que la Constitución Española dispon de les distintes modalidaes llingüístiques d'España, patrimoniu cultural que va ser oxetu d'especial respetu y protección, "pero nunca imposición como resultáu de la so ideoloxía sectaria", remarcó.

   La concejala de Cultura, Montserrat López Moro, incidió en que la sentencia declara nulu'l citáu Plan pero non pol conteníu sinón por un defectu de tramitación.

   Apuntó, coles mesmes, en que'l Conceyu, al nun ser una disposición normativa, ta obligáu a cumplir respetando siempres los principios de "llibertá y voluntariedá" nel usu per parte de la ciudadanía de la Llingüa.

   Nel casu de la vocera del PP, la vicealcaldesa xixonesa, Ángela Pumariega, remarcó qu'el so grupu parlamentariu yá amosó refugu na Xunta Xeneral del Principáu d'Asturies a la obligatoriedá del asturianu, magar sofita la so defensa.

   Nesa llínea, indicó que cuando s'aprobó esti Plan sofitaronlu porque establecía un plan d'acción que diba actuar respetando los principios de "llibertá y voluntariedá" per parte de la ciudadanía. D'ende que tamién sofiten esti recursu, al cuntar que esti Plan tien que siguir siendo un preséu non normativu.

   El conceyal del PSOE Ramón Tuero, pela so parte, argumentó l'astención del so grupu al considerar que lo meyor ye empezar de nuevu la tramitación.

   A esti respectu, señaló que son seis coses les que marca la sentencia y que pueden correxise. Sicasí, sollertó de que'l camín xudicial nun ye "falagueru" y perderíase enforma tiempu si solo recúrrese'l fallu xudicial. Por ello, dende'l PSOE pidióse que dende la FMC se vaya trabayando nes cuestiones que llevaron a la nulidá d'esti Plan.