Actualizado 04/12/2015 13:06 CET

Inversiones y ayudes directes centren les cuentes de Desarrollu Rural

María Jesús Álvarez, conseyera de Desarrollu Rural
Europa Press

UVIÉU, 4 d'Avientu (EUROPA PRESS)

La Conseyería de Desarrollu Rural y Recursos Naturales del Principáu centra bona parte de los 162 millones del proyectu de presupuestu pal 2016 n'inversiones y ayudes directes nel mediu rural, con una cuantía de 123 millones. Coles mesmes, otru exe del departamentu de María Jesús Álvarez va ser la promoción d'incorporación de moces a la producción, con un repartu de 8,5 millones.

Al respective, la conseyera comprometióse, mientres la presentación del proyectu presupuestariu na Xunta Xeneral del Principáu, a entainar los trámites pa que la convocatoria de toles llinies de sovenciones tengan llugar nel primer trimestre del añu.

El proyectu del Executivu del socialista Javier Fernández inclúi, tamién, la puesta en marcha del nuevu Programa de Desarrollu Rural (PDR), al que se destinen 62 millones y espérase que puea movilizar 560 millones mientres el periodu 2014-2020.

Según Álvarez, la propuesta presupuestaria del so departamentu tien "una más que notable vocación inversora" y nun pue entendese de forma aisllada, sinón nel marcu de l'actuación d'un Gobiernu que pon l'acentu "nes polítiques sociales" tratando, al empar, de "caltener el puxu a los sectores productivos pa xenerar empléu y potenciar la económica, favoreciendo la cohesión territorial".

Asina, calcó en que'l presupuestu de Desarrollu Rural y Recursos Naturales aumenta nun 2,57 por cientu, con más de 4 millones d'euros de subida al respective del 2015. La modernización de les esplotaciones, la dotación de valor añadíu a la producción agroalimentario y forestal, o l'apoyu al desarrollu económicu nos espacios protexíos son dalgunos de los oxetivos de la Conseyería pal próximu añu.

Igualmente, el proyectu pon el focu na llucha contra los incendios forestales y les ayudes a los ganaderos y llabradores, el canon cinexéticu y les indemnizaciones por daños de fauna montesa, xuntu con redes de collaboración que promuevan la investigación tantu pal caltenimientu de fauna y flora como pa la modernización, diversificación y reestructuración del sector pesqueru.

No que cinca al saneamientu ganaderu, la conseyera esplicó que se va tratar d'ordenar el calendariu de la campaña y d'elevar les indemnizaciones por sacrificiu, en casos de positivu.

María José Álvarez destacó que'l proyectu apuesta, amás, por sectores emerxentes como'l vitivinícola, con una subida presupuestaria superior al 200%, y tradicionales como la mazana y la sidra. Con too, caltién que la propuesta aspira a "meyorar la calidá de vida nel mediu rural" pa fixar población y ofrecer garantíes de futuru, en collaboración colos axentes implicaos.

Para leer más