BBK Fundazioak eta Kutxabankek bost milioi euro mobilizatuko dituzte autonomoei zuzenduriko mailegu lerro berezi batekin

BILBO, 15 (EUROPA PRESS)

Kutxabank finantza taldeak eta BBK Fundazioak aurrez onartutako maileguen lerro berezi bat sortu dute covid-19aren krisiak kaltetutako Bizkaiko autonomoentzat. Kreditu lerro bereziak bost milioi euro inguru mobilizatzea aurreikusi dute.

BBK Fundazioak, finantza taldeko akziodun nagusi gisa, 100.000 euro jarriko ditu, eta horri esker, profesionalak %2,95eko ITN lehentasunezko interes tasaz baliatuko dira, BBK-ko iturriek prentsa ohar bidez jakinarazi dutenez.

Bizkaian bizi diren autonomoei zuzenduta dago ekimena, pandemiak euren jarduera profesionalari eragin baldin badio. Maileguak ematea "aurrez onartutakoen" formularen arabera egingo da. Mailegu horien ezaugarri nagusia da oso arin eta erraz formalizatzen direla, izapide luzeak alde batera utzita.

Horrela, Kutxabanken aldez aurretik onartutako kreditua duten profesional autonomoek 6.000 eurorainoko mailegua hartu ahal izango dute berehala, inolako dokumentazio edo agiririk aurkeztu beharrik gabe. Amortizazio epeari dagokionez, 60 hilabeterainokoa izan daiteke, irekiera gastu barik. Finantza produktu berria Kutxabanken bulego sarean bakarrik kontratatu ahal izango da.

Covid-19ak gizartean eragindako ondorioak arintzeko eta erasandako
enpresa eta profesionalei likidezia errazteko finantza taldeak eta banku fundazio akziodunek abian jarritako neurriei gehitzen zaie kanpaina berria.

Beste neurri batzuren artean, BBK Fundazioak 'Kreo en Ti' ekimena jarri du abian, Bizkaiko saltoki txikiei bizirik irauten laguntzeko eta herritarrak kontzientziatzeko.

"Izan ere, gure merkataritza ingurunea osatzen duten establezimenduen jarduera ekonomikoa gu guztion eta bakoitzaren laguntzaz bakarrik suspertu eta berreskuratuko da, eta, horretarako, zuzeneko bonuen bidez ondasun edo zerbitzuen erosketa aurreratu ahal izango da, bonu horiek trukatuz establezimenduak irekitzen direnean", azaldu dute.

Gainera, finantza taldeak 1.700 milioi euro bideratu ditu krisiak kaltetutako familia, enpresa eta pertsonei laguntzeko finantzaketa gisa, eta horien esku aurrez onartutako maileguen lerro bat jarri du, 26.000 milioi eurokoa. Halaber, tratamendu berezia eskaini die saltokiei negozio kontuen eta TPV terminalen mantentzean hobariak lor ditzaten.