Bikotekide ohiari sexu erasoa egiteagatik Bizkaiko Auzitegiak gizon bati ezarritako 11 urteko espetxealdia berretsi dute

BILBO 6 (EUROPA PRESS)

Euskal Autonomia Erkidegoko (EAE) Auzitegi Nagusiko Arlo Zibileko eta Zigor Arloko Salak berretsi egin du Bizkaiko Auzitegiak gizon bati ezarritako 11 urteko espetxe zigorra, bikotekide ohiari sexu erasoa egiteagatik. Zigortuak biktima bere etxean lotan zegoela ezustean harrapatu zuen, sartzeko baimenik izan gabe etxean agertu ndoren.

Horrela, EAEko Auzitegi Nagusiak ohar baten bidez jakinarazi duenez, atzera bota du akusatuak Bizkaiko Auzitegiaren ebazpenaren aurka jarritako errekurtsoa. Ebazpen horren arabera, gizona bizilekua bortxatu izanaren delitugilea da, baita sexu erasoaren delitugile ere, haragizko sarbidez gauzatua, eta senidetasun astungarriarekin.

Auzitegi Nagusiaren arabera, gizona zigortzen zuen epaian, Bizkaiko Auzitegiak emakumearen "arrakalarik, kontraesanik edo anbiguotasunik gabeko deklarazioa" baloratu zuen, bai eta emakumearen bertsioa babesten zuten "adierazle periferiko nabarmenak" ere. Bertan baieztatu zen, frogatutako gertaerek erakusten zutenez, "biktimaren sexu askatasunaren aurkako erasoa eta indarkeriaz eta larderiaz ezarritako sexu kontaktua egon zela, onartu gabeko haustura horren ingurumarian".

Akusatuak EAEko Auzitegi Nagusian argudiatu zuen emakumearen kontakizuna ez zela sendoa, ez zela berrespen periferikorik egon eta ez zela kargu frogarik izan bere errugabetasun presuntzioa ahultzeko, besteak beste.

EAEko Auzitegi Nagusiak, berriz, ez ditu alegazio horiek onartu, eta salatzailearen lekukotza "sendoa eta arrazionala" dela esan du. Halaber, Bizkaiko Auzitegiak lortutako froga inferentzia "behar bezala arrazoituta" dagoela uste du, bere alderdi guztietan berretsiz auzitegi horrek emandako ebazpena. Epaia ez da irmoa eta Auzitegi Gorenean errekurritu daiteke.