EAEko industria prezioak %1,5 igo dira abuztuan aurreko hilaren aldean eta urte arteko tasa %2,6 jaitsi da

BILBO, 22 (EUROPA PRESS)

Euskal Autonomia Erkidegoko (EAE) industria prezioak %1,5 igo dira abuztuan aurreko hilaren aldean, eta horrela, urte arteko tasa %2,6 jaitsi da, Eustat euskal estatistika erakundeak landutako datuen arabera.

Azterketa zehatzagoa eginda, elikaduraren, edarien eta tabakoaren industria (-%1,9), industria kimikoa (-%0,5) eta ura (-%0,3) sektoreek izan dituzte prezioen jaitsierarik handienak abuztuan aurreko hilaren aldean. Aitzitik, koke lantegiak eta petrolioa fintzea (%11,2), botiken fabrikazioa (%1,4) eta zurgintza, papera eta arte grafikoak (%1,2) sektoreek izan dituzte prezioen igoerarik handienak.

Ondasunak helburu ekonomikoaren arabera sailkatuz, energiaren prezioak %6,3 igo dira abuztuan uztailaren aldean, eta bitarteko ondasunak eta ekipo ondasunenak %0,6na; kontsumo ondasunen prezioak, aldiz, %1,6 jaitsi dira.

Bestalde, urte arteko aldian, energia elektrikoa, gasa eta lurruna (-%20,7), koke lantegiak eta petrolio findegiak (-%13,8) eta industria kimikoa (-%6,3) adarrek izan dituzte prezioen jaitsierarik handienak, eta ateratze industriak (%10,4), kautxua, plastiko eta beste produktu mineral ez-metalezkoek (%10,0) eta elikaduraren, edarien eta tabakoaren industriak (%9,2) igoerarik handienak.

Abuztuko prezioen aldakuntza positiboa izan da urte artean helburu ekonomikoaren arabera sailkatutako ondasun talde handi guztientzat, energiarentzat izan ezik, %17,7ko jaitsiera izan baitu. Horrela, kontsumo ondasunen prezioak %8,1 igo dira, ekipo ondasunenak %5,1 eta bitarteko ondasunenak %2,4.