Eduardo Anitua, Enrike Zelaia, Bera Bera, Etxeondo, UNRWA eta Juan Maria Atutxa dira 2025eko Sabino Arana saridunak

BILBO 13 (EUROPA PRESS)

Eduardo Anitua mediku, ikertzaile eta zientzialari gasteiztarrak, Enrike Zelaia musikari, musikagile eta folkloristak, Bera Bera eskubaloi taldeak, Etxeondo enpresak, Ekialde Hurbileko Palestinar Iheslarientzako NBEren Agentziak (UNRWA) eta Juan Maria Atutxa politikari ohiak jasoko dute 2025eko Sabino Arana Saria urtarrilaren 25ean Bilboko Arriaga Antzokian egingo den ekitaldian.

Hala iragarri dute astearte honetan Bilbon Arantxa Tapia Sabino Arana Fundazioaren presidenteak eta Ignacio Etxeberria Fundazioaren idazkariak, Sabino Arana Sarien 37. edizioaren aurkezpenean. Sariak 1989tik banatzen hasi zirenetik aitortuak izan diren 209 lagun eta erakundeei gehituko zaizkie sei saridun berriak.

Sabino Arana sariak urtero ematen dira, euskal abertzaletasunaren sortzailearen jaiotzaren urteurrena dela eta. Sariak emanda, gizartearen alde eginiko lan eta gaitasunagatik nabarmendu diren pertsona, erakunde edo kolektibo ospetsuak aintzatesten ditu Fundazioak.

Saritu berriei dagokienez, Sabino Arana Fundazioak Eduardo Anitua doktore gasteiztarraren ibilbide bikaina nabarmendu eta goretsi nahi izan du, "munduko erreferente esanguratsuenetakoa delako ahoko inplantologian eta medikuntza birsortzailean", Arantxa Tapiak azpimarratu duenez.

Enrike Zelaia musikari, konpositore eta folklorista ere aitortu du Sabino Arana Fundazioak, "soinu musikaren eta kulturaren bitartez euskal nortasuna ikertzen, berreskuratzen eta zabaltzen egindako lan oparo eta funtsezkoagatik". "Enrikeren bizitza etengabeko konpromisoa izan da berezko tradizio eta balio kulturalak biziberritzeko ikerlanean", esan du Tapiak.

Bestalde, Sabino Arana Fundazioak Bera Bera eskubaloi taldea saritu du "izan duen ibilbide bikainagatik". Tapiak gogorarazi duenez, 1983an Donostian sortu zenetik, "emakumezkoen eskubaloiaren erreferentea" izan da Bera Bera eta "garaipen zerrenda paregabea" du (bederatzi liga, zortzi kopa eta hamar superkopa), "Donostiaren, Gipuzkoaren eta Euskadiren irudia bultzatu du nazioarteko kirol esparruan, eta gainera, emakumezkoen eskubaloiaren inguruko zaletasun sendoa erein".

Orobat, Sabino Arana Fundazioak gorazarre egin nahi dio Etxeondori, 1976tik ehungintzako jakintza eta txirrindularitzarekiko grina uztartu dituen enpresa gipuzkoarrari, gaur egun goi mailako kirol modaren "nazioarteko erreferente" baita. "Etxeondoren ibilbide eredugarria, kalitatean, etengabeko berrikuntzan eta jantzi bakoitzaren artisau zaintzan oinarritua, lagungarria izan da kirola duintzen eta euskal industria mundura hedatzen", adierazi du Tapiak.

UNRWA

Era berean, Ekialde Hurbileko Palestinar Iheslarientzako NBEren Agentziak (UNRWA) "1949. urtean sortu zenetik justiziaren, bakearen eta giza eskubideen defentsaren alde izan duen konpromiso apurtezinagatik" jasoko du 2025eko Sabino Arana Saria.

"Erakundearen funtsezko eginkizuna, hau da, milioika iheslari palestinarren hezkuntza, osasuna eta babesa bermatzea, guztiz bat dator euskal abertzaletasunaren tradizio humanista, solidario eta demokratikoarekin. Sari honek agerian jarri nahi du gatazken konponbide baketsuaren aldeko euskal apustua, bai eta herriek, kasu honetan, palestinar herriak, duintasunez bizitzeko eta palestinarren etorkizuna askatasunez eta demokratikoki erabakitzeko eskubidea ere", azaldu du Tapiak.

Azkenik, Juan Maria Atutxa politikari ohiak "Euskadiren alde egindako lana eta dedikazioa" goretsi nahi izan ditu Sabino Arana Fundazioak, eta "ibilbide instituzional bikainagatik, indarkeria garaian erakutsi zuen kemenagatik, bizikidetza demokratikoaren aldeko apustuagatik eta Sabino Arana Fundazioan buru-belarri aritu izanagatik" sarituko du.