Ekoetxea Meatzaldea Jaurlaritzako ingurumen zentroen sarean sartu da eta jarduerak irailean hasiko dira, Gallartan

BILBO, 30 (EUROPA PRESS)

Iñaki Arriola Ingurumen, Lurralde Plangintza eta Etxebizitza sailburuak ostegun honetan iragarri du Gallartako (Bizkaia) Corta eraikinean kokaturiko Ekoetxea Meatzaldea Eusko Jaurlaritzako ingurumen zentroen sareari atxiki zaiola, eta jarduerak irailaren amaieran hasiko direla, ikasturte berriarekin batera.

Urdaibai, Txingudi, Azpeitia eta Peñas Negrasko ekoetxeak biltzen dituen ingurumen zentroen sareak azken hamarkadan 800.000 bisita baino gehiago jasi dituela jakinarazi du Arriolak.

Meatzaldea Ekoetxea Gallartako Corta eraikinean kokatuta dago, Zugaztieta, Triano mendiak eta Galdames inguruan, eta Peñas Negrasko zentroari gehitu zaio. Hala, aurrerantzean, bi zentroek ingurumen hezkuntzarako zentro bakar bezala funtzionatuko dute, eta, horri esker, Meatzaldea meategien Biotopora sartzeko atea izango da.

"Garrantzitsua da aintzatestea eta nabarmentzea zentro honen hazia Peñas Negrasek garatu duen jarduera osoan dagoela. Zentro hori aurrendaria izan zen bere garaian, eta, 25 urteko ibileraren ostean, erreferente bihurtu da, bai Euskadiko ikastetxeetarako, bai tokiko herritarrentzat eta publiko orokorrarentzat. Horrela frogatzen du eskola talde gehienen eta bertako jardueretan parte hartzen duten pertsonen fideltasunak", adierazi du Arriolak.

ERAIKINA

Ekoetxea Meatzaldeak "auditorio paregabe bat" du, ehun pertsona har ditzakeena eta Corta meategiaren gaineko ikuspegi pribilegiatua eskaintzen duena; meategia eraikinaren kanpoko balkoitik ere ikus daiteke. Halaber, lantegien eremu bat dauka, jarduerak ikasleekin egiteko. Gainera, erakusketa iraunkor bat izango du, "bertan erakusteko gizakiok natur ingurunearen gaian dugun eragin handia, eta nabarmentzeko oso garrantzitsua dela pertsona guztiok haren kontserbazioan parte hartzea".

Eraikin berriko jarduerak irailaren amaieran hasiko dira, ikasturte berriarekin batera. Zentroa abiatzeko prozesua 2014an hasi zen, Meatzalea Ekoetxea berria hartzen duen bukatu gabeko eraikinaren obrak bukatzeko akordioa sinatu zutenean Eusko Jaurlaritzak, Bizkaiko Foru Aldundiak, Anbato-Zierbeneko Udalak eta Euskal Herriko Meatzaritzaren Museoa Fundazioak.

"Eraikin berriak ahalbidetuko digu ingurumen hezkuntzako eta Meatzealdeko biotopoaren interpretaziorako programen eragin eremua hedatzea eta ingurune hau bistatzen duten pertsonen konforta eta harrera hobetzea. Lurraldeko beste eragile batzuekin batera lan egingo dugu Meatzealdea ezagutzera emateko eta haren balioa nabarmentzeko, lekua bisita lezaketen pertsonentzat erreferentzia kultural erakargarria izan dadin laguntzeko", azpimarratu du Ingurumen sailburuak.