Eskola kirola egiten duten umeei KirolaON ezagutarazteko kanpaina hasi du Bizkaiko Aldundiak

BILBO 8 Feb. (EUROPA PRESS) -

Bizkaiko Foru Aldundiak kanpaina berri bat jarri du martxan eskola kirola egiten duten lurraldeko adingabeei KirolaON komunikazio tresna ezagutarazteko, eta 46.000 eskola umek informazio gutun bana eta tresnaren irudia duen giltzatako bana jasoko dute etxean hurrengo asteetan.

Era berean, foru erakundeak jakinarazi duenez, informazio kartelak argitaratu eta seinale espezifikoak prestatu ditu helburu berarekin, Bizkaiko kirol instalazioetan jartzeko, udalen eta kirol entitateen laguntzarekin.

Ekimenaren helburua da gazteei KirolaON zuzenean ezagutaraztea, edozein zalantza, ezinegon edo susmo izan bezain laster erabiltzera bultzatzeko, modu anonimoan eta konpromisorik gabe ere.

2024an sorturiko KirolaON komunikazio kanal irekia, azkarra eta konfidentziala da, eta kirol arloan adingabeen ongizatea hobetzea du helburu. Bide ematen du indarkeriazko edo ezinegonezko edozein egoera modu integral eta koordinatuan kudeatzeko, hezkuntza irtenbideak eskainiz, kasu larriak bideratuz eta kirolariei, haien klubei zein umeak babesteko arduradunei lagunduz.

Tresnaren atzean diziplina anitzeko lantalde bat dago, haurren babesean espezializatutako zenbait profesionalek osatzen dutena. Profesional horiek esku hartzen dute komunikazioa jasotzen denetik ebatzi arte, beti ikuspegi prebentziozkoa eta hezigarria harturik.

KirolaON 2024ko urriaren 3tik abiatu zenetik, norbanakoek, klubek eta erakundeek etengabe erabili dute kanala. Ezarri zen lehenengo urtean, 144 kasurekin lotutako 440 komunikazio jaso ziren, eta haietako hiru auzitara eraman. 2025-2026ko ikasturtean, 49 komunikazio jaso dira, gehienak helduek eginak (senideek, teknikariek edo taldeen ordezkariek).

ERRESPETUA

Bestalde, parte hartze handiena duten futbola eta saskibaloia moduko kiroletan sentsibilizazioa indartzeko, 'Errespetua' hitza duten pankartak banatuko dira eskola kiroleko kluben artean, eta taldeek partiden aurretik erakutsiko dituzte, ikusleak kontzientziatzeko eta kirol ingurune errespetuzkoagoa sustatzeko.

Datuen arabera, ingurune horretan gertatzen dira gorabehera gehienak. Joan den ikasturtean, 13 gertakari detektatu ziren harmailetan, eta horixe da hirugarren indarkeria motarik ohikoena. Horregatik, Bizkaiko Foru Aldundiko Kirol Sailak erabaki du prebentziozko ekintza espezifiko batekin esku hartzea.