Euskal turistei zuzendutako 'Bidaia arduratsu baterako gida' kanpaina aurkeztuko du Euskadik Fiturren

BILBO 19 (EUROPA PRESS)

Euskadik 'Bidaia arduratsu baterako gida' kanpaina aurkeztuko du aste honetan Madrilen egingo den 2026ko Fitur nazioarteko azokan, turismo jasangarriarekin, errespetuzkoarekin eta etikoarekin duen konpromisoa indartu nahian.

Javier Hurtado Eusko Jaurlaritzako Turismo, Merkataritza eta Kontsumoko sailburuak eta Daniel Solana Basquetour Turismoaren Euskal Agentziako zuzendariak aurkeztu dute astelehen honetan Bilbon Euskadik Fitur 2026an izango duen parte hartzea. Azoka asteazkenetik igandera egingo da, urtarrilaren 21etik 25era.

Azaldu dutenez, Fiturren aurkeztuko den 'Bidaia arduratsu baterako gida' Turismo, Merkataritza eta Kontsumoko Saila eta Basquetourrek sustatutako sentsibilizazio turistikoaren estrategiaren hirugarren ardatza da eta "zirkulua ixten du", 'Turista maitea' (Euskadi bisitatzen dutenei zuzendua) eta 'Turismo maitea' (tokiko biztanleak ardatz dituena) kanpainen ondoren.

Kanpainaren berriaren bidez, Jaurlaritzak euskal herritarrei zuzenduko die mezua, kanpora bidaiatzen dutenean koherentzia eta elkarrekikotasuna eskatuz. "Bisitatzen gaituztenei gure kultura, ingurunea eta bizimodua errespetatzeko eskatzen badiegu, modu berean jokatu behar dugu beste helmuga batzuetara bidaiatzen dugunean", adierazi du Hurtadok.

Kanpainak hainbat balio sustatuko ditu, hala nola ingurune naturalarekiko, kulturalarekiko eta sozialarekiko errespetua, tokiko biztanleekiko bizikidetza eta jokabide turistikoaren erantzukizun indibidual eta kolektiboa. "Helburua da euskal bidaiariak turismoan jardunbide egokien enbaxadore bihurtzea, jasangarritasuna balio unibertsala delako ideia indartuta, tokiko eremura mugatu gabe", gaineratu du.

Kanpaina honekin, Euskadik "indartu egiten du balio ekonomiko eta soziala sortzen duen turismoarekiko konpromisoa, erantzukizunean, etikan eta bisitarien eta herritarren arteko errespetuan oinarrituta, bere lurraldean zein kanpoan".

"FUNTSEZKO" URTEA

Euskadiren parte hartzea Fitur azokan euskal turismorako "funtsezkoa" den eta "erregulazioan, jasangarritasunean eta koordinazio instituzionalean egindako aurrerapenek" markatzen duten urte batean kokatzen da.

Horrela, joan den urtean stand instituzional onenaren izendapena jaso ondoren, diseinua errepikatu eta Euskadiko standa txalaparta handi batean inspiratu da berriro, "Euskadi plural, ireki eta abegikor baten ikur".

Hiru egun profesionaletan, erakustokiak "agenda bizia" izango du, aurkezpen instituzionalekin, topaketa sektorialekin eta bilera profesionalekin, eta asteburuan zehar publikoari irekitako jarduerak antolatuko dira. Aldundiek, udalek, eskualdeek eta garapen agentziek hainbat proiektu aurkeztuko dituzte jasangarritasunarekin, irisgarritasunarekin, digitalizazioarekin, turismo aktiboarekin , zikloturismoarekin, gastronomiarekin eta kulturarekibn lotuta.

Gainera, Euskadiren guneak bilerak egiteko eremu zabala izango du turismo sektorearentzat, eta aurkezpen estrategikoen agertoki izango da, hala nola 2026rako Basquetourren ekintza plana, helmuga turistiko adimendunen ekimenak, lankidetza-akordioak eta nazioarteko sustapen ekintzak.

Azkenik, asteburuan zehar, standak kulturako eta gastronomiako programazioa eskainiko du, dastatze, tailer, euskal dantza erakustaldi, elkartasun ekintza eta familiei zuzendutako proposamenekin. Euskadik bere irudia indartuko du horrela, helmuga jasangarri, askotariko eta nortasun propiodun gisa.