Hizkuntza politikan duten elkarlana berritu dute Jaurlaritzak, Nafarroako Gobernuak eta Euskararen Erakunde Publikoak

BILBO, 11 (EUROPA PRESS)

Eusko Jaurlaritzak, Nafarroako Gobernuak eta Iparraldeko Euskararen Erakunde Publikoak hizkuntza politikan Hiruko Ituna Hitzarmenaren bidez modu koordinatuan lanean jarraitzeko konpromisoa berritu dute ostegun honetan, Iruñean.

Nafarroako Jauregian egindako ekitaldian, 2017an sinatutako akordioaren 2020ko jarduera plana aurkeztu dute hiru erakundeek. Lanerako bost arlo zehatzetan garatuko da plana: helduentzako euskarazko hezkuntza eta euskara irakastea, euskararen erabilera bultzatzea, euskararen aldeko hausnarketa bultzatzea, euskararen azterketak eta corpusa, eta lankidetza Europako esparruan.

Ana Ollo Nafarroako Gobernuko Herritarrekiko Harremanetako kontseilariak, Bingen Zupiria Eusko Jaurlaritzako Kultura eta Hizkuntza Politikako sailburuak eta Beñat Arrabit Euskararen Erakunde Publikoko lehendakariak parte hartu dute ekitaldian, eta hitzarmenaren esparruan 2019an garatutako ekintza nagusiak eta 2020an burutuko direnak errepasatu dituzte.

2017-2021 aldirako indarrean den esparru hitzarmenaren helburu nagusiak dira mugaz gaindiko lankidetza garatzea hizkuntza politikarekin loturiko gaietan, hiru herri erakundeen artean harremanak garatzen jarraitzea eta arlo horretan jardunbide egokiak trukatzea.

Zupiriak azpimarratu duenez, "azken urteotan modu naturalean garatzen ari den eta hizkuntza politikaren arloan lankidetzan aritzeko oso eraginkorra izaten ari den elkarlana posible da". "Akordio honek ematen digun markoari esker, informazioa trukatzen dugu, proiektuak partekatzen ditugu, herritarrei erraztasunak eskaintzen dizkiegu, baliabideak batzen ditugu eta lan egiteko moduak sistematizatzen ditugu", azaldu du.

Halaber, Olloren hitzetan, "hitzarmen hau lankidetzaren, harreman normalizatuen, sinergien eta bateratzearen aldeko konpromisoa da, bai eta euskararen aldeko konpromisoa ere, euskararen lurraldeko euskal hiztunei zuzendutako berariazko neurriak garatzea ahalbidetzen digun ekintza programa batekin".

"Nafarroaren kasuan, hizkuntza propioak dituzten autonomia erkidegoekin eta Europako eskualdeekin lankidetzan aritzeko eta koordinatzeko konpromisoa legealdi honetako Programa Akordioan jasotako akordio bat da", gaineratu du.

Hiru herri erakundeetako arduradunek aurkezpenean azaldu dutenez, covid-19k sortutako krisia dela eta, hitzarmenean jasotako zenbait ekintza osasun baldintzek gomendatzen duten arte atzeratuko dira, hala nola ikasleen trukeak edota mugikortasuna.

Ildo horretan, Arrabitek azaldu duenez, "guretako oso estrategikoa den proiektu bat ezarria genuen 2020eko eranskinean: gazteendako mugaz gaindiko egonaldiak. Ideia da hiru lurraldeko gazteen arteko uda lekuak antolatzea, euskara izaki haien hizkuntza amankomuna".

"Hori aurtengo udan eratu nahi genuen baina egoera sanitarioak ez digu aukera emanen horren plantan ezartzeko. Aurten obratzen ez badugu ere, lanean segitzen dugu proiektu hori ontzeko eta 2021erako anbizioa duen euskarazko mugaz gaindiko egonaldi proiektua antolatzeko", ziurtatu du.

HEZKUNTZA

Hezkuntzari dagokionean, hiru aldeek adostu dute ikasleak lurraldeen artean trukatzeko premiak aztertzea gurasoen elkarteekin elkarlanean, horiei erantzuteko proiektu pilotua definitzeko. Halaber, Euskal Autonomia Erkidegoko (EAE) unibertsitateetara sartzeko modalitateak aztertuko dituzte ikasketak euskaraz egiten jarraitu nahi duten ikasleentzat. Gainera, diplomak edo "titulu binazionalak" sortzeko aukerak aztertuko dituzte Eurogunearekin edo Euroguneko unibertsitateekin lankidetzan.

Helduei euskara irakasteari dagokionez, batzorde tekniko batek aztertuko du Jaurlaritzak arlo horretan garatutako oinarrizko curriculuma Nafarrora egokitzeko modua, eta maila ezberdinak gainditzeko beharrezko baldintzak adostuko ditu.

Horrez gain, hiru aldeek adostu dute sektore horretan lan egiten duten profesionalei hiru erakundeek antolatutako prestakuntza ekintzetan parte hartzea eskaintzea edota hiru aldeen premien diagnostiko bat egitea. HABEko liburutegiko materialak hiru erakundetako teknikariei eskainiko zaizkie, eta kontsulta espezifikoak erantzungo dituzte.

Hizkuntza gaitasunak ziurtatzeari dagokionez, berriz, hiru aldeek erkidego bakoitzeko ziurtagiriak ezagutzeko lan egingo dute, ziurtapen sistema bateratzeko edo baliozkotzeko helburuarekin.

ERABILERA

Euskararen erabilerari eta aisiari erreparatuta, Jaurlaritzak, Nafarroako Gobernuak eta Euskararen Erakundeko Publikoak adostu dute haurrei eta gazteei zuzendutako kirol eta aisialdiko ekimenei buruzko berrikuntzak bateratzea eta trukatzea. Egoerak baimentzen duenean, mugaz gaindi euskarazko egonaldia antolatzeko aukera aztertuko da.

Ingurune digitaleko euskararen gainean, jarraitzea erabaki dute, egun dauden baliabideak bateratuz, edota euskara Interneten garatzea, bereziki Wikipedia Euskaraz proiektuaren bitartez. Horretarako, Wikilarien Elkartearekin garatutako planak eta proiektuak partekatuko dira, eta plataforma horretan aztertuko da euskarazko edukiak elkarrekin garatzeko proiektua bideragarria den ala ez.

Euskarari eta eremu sozioekonomikoari dagokionean, eremu horretan euskara sustatzeko dauden praktiken diagnostikoa egingo dute, eta enpresei laguntzeko dispositibo komunak definituko, lurralde bakoitzeko errealitateak kontuan hartuta.

Bestalde, euskararen aldeko hausnarketari eta horren sustapenari dagokionean, Euskaraldia proiektuan parte hartzea ez ezik, 2019an EAEk abian jarritako familia transmisioarekin loturiko bideoen proiektuaren garapena aztertzea ere adostu dute hiru aldeek.

Hausnarketarako guneei dagokienez, jada sortutako guneetan parte hartuko dute hirurek, eta Euskararen Aholkularitza Kontseiluko ordezkariek Hakobaren batzordeetara joan ahal izango dute.

IKERKETAK

Halaber, ikerketa soziolinguistikoen arloan, adostu dute hiru aldeek modu kolaboratiboan sortutako adierazleen sistema elkarrekin garatzen jarraitzea eta horiek egokitzen lan egitea, lurralde bakoitzaren errealitateak gehiago kontuan hartuta.

Era berean, 2020an, VII. Inkesta Soziolinguistikoa prestatzeko lanak bideratuko dira, eta inkesta 2021ean egingo da. Euskaraldiari dagokionez, batera lan egingo dute metodologian eta gauzatzean nahiz azterketaren emaitzak hedatzeko lanetan ere.

Hizkuntza corpusari erreparatuta, hiru lurraldeetako adituak sartuko dira Euskararen Aholku Batzordeko Terminologiaren Batzorde Berezian, Jaurlaritzako terminologiako adituekin lankidetza egituratuko da, eta Euskalterm terminologiaren datu basean sartuko dira Ipar Euskal Herriko terminoak.

Azkenik, Europako esparruko lankidetzari dagokionez, europar finantzaketa iturrien esparruan proiektuak aurkezten jarraitzea erabaki dute, eta POCTEFA etorkizuneko programa operatiboetan batera lanean jarraitzea, hizkuntza politika lehentasunezko inbertsio gisa integratzeko.