Jaurlaritzak 2025-2030 aldirako Mugiment ekintza planaren berri eman du Legebiltzarrean

GASTEIZ 18 Jun. (EUROPA PRESS) -

Ibone Bengoetxea Eusko Jaurlaritzako lehen lehendakariorde eta Kultura eta Hizkuntza Politikako sailburuak 2025-2030 epealdirako Mugiment ekintza planaren zehaztasunak eman ditu asteazken honetan Eusko Legebiltzarreko Kultura, Euskara eta Kirol batzordean, batzordekideen ekarpenak jasotzeko.

Datozen asteetan Mugiment Mahaiko kideekin ere batzartuko da Bengoetxea, jarduera fisikoaren sustapena bultzatzea helburu duen planaren berri emateko eta euren proposamenak jasotzeko, plana indartzeko asmoz.

"Legegintzaldi honetan, Eusko Jaurlaritzaren Gobernu Programako ardatzetako bat, lehena, pertsonak erdigunean jartzea eta euskal gizartean ongizatean haztea da", adierazi du Bengoetxeak Legebiltzarrean.

Izan ere, bere hitzetan, erronka demografiko bati aurre egin behar zaio: "Gizartearen bizi itxaropena handitzeak biztanleriaren adinekoen proportzioa handitzea ekarri du eta lehentasunezko erronka izango da zahartzarora ahalik eta osasuntsuen eta bizi kalitate altuenarekin iristea".

Helburu hori lortzeko bidean, Jaurlaritzak '2025-2030: Mugiment Ekintza Plana' osatu du, "gure gizartearen ongizate integralerako eta euskal komunitate osasuntsuago baterako tresna izango den plana".

Bengoetxeak azaldu duenez, Mugiment ekintza planak herritarren jarduera fisikoaren maila hobetzen lagundu nahi du, eta duela urte batzuetatik hona egiten ari den bidean urrats berri gisa ulertu behar da.

Ekintza planaren helburua definitzeko, zera adierazi du Bengoetxeak: "Pertsona orok bizitza aktiboa izatea ahalbidetzen duten ingurune seguru eta egokiez eta aukera ezberdinez gozatu ahal izango duela bermatzea, norbanakoen zein komunitatearen osasuna hobetzeko eta Euskadiko garapen sozial, kultural eta ekonomikoan laguntzeko".

Planaren leloak GAPPA planak proposatutakoa (More active people for a healthier world - Jende aktiboagoa mundu osasuntsuago baten alde) eta Euskadi 2030 Osasun Planak proposatutakoa (Euskadi osasungarriagoa) jasotzen dituela azaldu du: "Pertsona aktibo gehiago Euskadi osasuntsuagorako".

Hain zuzen ere, hori da planaren ikuspegi nagusia, eta horren barruan, zazpi dira printzipio gidariak: giza eskubideen ikuspegia, ekitatea bizitza osoan, ebidentzian oinarritutako jarduna, unibertsaltasun proportzionala, politika koherentzia eta osasuna politika guztietan, agintari, gizarte, familia eta komunitateak inplikatzea eta ahalduntzea, eta sektore anitzeko lankidetzak.

METODOLOGIA PARTE HARTZAILEA

Mugiment ekintza plana Jaurlaritzako proiektu gisa ulertu behar dela zehaztu du Bengoetxeak, "pertsonen ongizatea zeharkako gai bat delako eta sail guztiak bustitzen dituelako".

Hala, planaren metodologia "guztiz parte hartzailea eta dinamikoa" dela azpimarratu du eta, beraz, Euskal Autonomia Erkidegoko jarduera fisikoaren sustatzaile guztiak gonbidatuko dira Mugiment ekintza planean parte hartzera, bereziki, Jarduera Fisikoaren Legeak esleitutako aginduak dituztenei.

Horrela, Bengoetxeak adierazi duenez, "lehen fasea etxe barrukoa izan da, hau da, Eusko Jaurlaritzako sailekin landu dugu plana eta ekarpenak, proposamenak, konpromisoak eta ekintzak jaso ditugu".

"Gaur, Legebiltzarreko batzordean planaren berri eman diet bertako ordezkariei: xehetasun guztiak azaldu dizkiet eta ekarpenak jaso ditugu. Era berean, Mugiment Mahaia osatzen duten udal, aldundi eta arloko eragileekin lan saio bat antolatuko dugu datozen asteetan eta bertan ere planaren xehetasunak azalduko ditugu, eta ekarpenak jasotzeko epea zabalduko dugu", azaldu du.

Gainera, plana "gardena" dela nabarmendu du sailburuak, eta planak jasotzen dituen ekintza konpromisoak ikusteko aukera egongo dela azaldu du, horretarako egokitu den webgunean.

Bertan konpromiso bilatzaile bat eskuragarri izango da, aplikazio baten bidez eta bilatzaile horrek hainbat eremu jasoko ditu: konpromisoa, arduradunak, hartzaileak, Legearen neurriekiko harremana, GAPPAren neurriekiko harremana, gauzatze-epea, eremu geografikoa, aurrekontua, ebaluazio adierazlea, helmuga, betetze maila eta informazio gehigarria.

Gainera, aukera izango da 2030era bitartean konpromiso eta sustatzaile berriak sartzeko planean, prozesua irekia izango baita. Horretarako, metodologiaren nondik norakoak beste administrazio eta erakundeetara zabalduko da, eta konpromisoen bilatzailea elikatzen joango da sustatzaile horiek neurri berriak onartzen dituzten heinean.