Haur Hezkuntzako lehen zikloa ematen duten eskola pribatuentzat 24,6 milioi euro

GASTEIZ, 19 (EUROPA PRESS)

Eusko Jaurlaritzako Gobernu Kontseiluak Haur Hezkuntzako lehen zikloa eskaintzen duten titularitate pribatuko haur eskolentzat 2017-2018 ikasturteko diru laguntzak arautzen dituen agindua onartu du astearte honetan. Hezkuntza Sailak 24.627.322 euro bideratuko ditu diru laguntzen deialdira.

Josu Erkoreka Jaurlaritzako bozeramaileak azaldu duenez, hezkuntza zentro horiek mantentzen laguntzea, zerbitzu horiek erabiltzen dituzten familien kuotak gutxitu eta bateratzea, eta 0-3 urteko haurrentzako eskoletan ematen diren hezkuntza eta zerbitzuaren kalitatea hobetzea dira diru laguntzen helburuak. Era berean, gaur egun dagoen eskaintza finkatzea eta, beharrezkoa izanez gero, handitzea ere bilatzen da laguntzen bidez.

Diruz lagunduko diren eskolak Haurreskolak Partzuergoko haur eskolek eskaintzen duten zerbitzuaren osagarri dira, eta, haiekin batera, euskal familietan familiaren bizitza eta lanbidea bateratzeko "funtsezko hezkuntza zerbitzua eskaintzen dute".

Gaur egun, Haur Hezkuntzako lehen zikloa eskaintzen duten 272 zentro pribatu daude Euskadin. Guztiak baimenduta daude hezkuntza maila hori eskaintzeko, eta diru laguntzen onuradun izan daitezke. 2017-2018 ikasturtean 13.384 haur daude eskola horietan matrikulatuta. Diru laguntzen deialdian eskaerak aurkezteko epea hilabetekoa izango da, deialdia Euskal Herriko Agintaritzaren Aldizkarian (EHAA) argitaratu eta hurrengo egunean hasita.