Larrialdietarako Arabako Funtsak 30.000 euro bideratuko ditu Haitiko lurrikarak eragindakoei laguntzera

GASTEIZ 23 Sep. (EUROPA PRESS) -

Gasteizko Udalak eta Arabako Foru Aldundiak eratutako Larrialdietarako Arabako Funtsak 30.000 euro bideratuko ditu abuztuaren 14an Haitin izandako lurrikarak kaltetuei laguntzera, Nazioarteko Elkartasuna elkartearen bitartez.

Richterren eskalan 7.2ko intentsitatea izan zuen lurrikarak. Geroztik, Haitik, eta bereziki nekazaritza eremuek, egoera humanitario eskasa bizi dute. Gainera, lurrikara gertatu zenean, herrialdea segurtasun larrialdi egoeran zegoen, uztailaren 7an errepublikako lehendakaria hil zutenetik.

Lurrikarak larriagotu egin ditu arazo guztiak. Unicef erakundearen arabera, 212.000 pertsona urik eta saneamendurik gabe geratu dira, edateko uren 56 sistemetan izandako kalte larrien eta beste 1.800ek izandako kalte txikien ondorioz. 60 osasun instalaziotan kalteak izan dira, eta horietako 28tan oso larriak.

Larrialdietarako Arabako Funtsaren arduradunen arabera, ereiteko garaia urrian hasi behar denez, lehenetsi egin behar da larrialdi laguntza, pertsona ahulenak, bereziki bost urtetik beherakoak, eta haurdun eta bularra ematen duten emakumeak babesteko.

Lurrikarak gehien kaltetu dituen hiru departamentuetan bikoiztu egin da elikadura segurtasun falta larrian dauden pertsonen kopurua, eta dagoeneko 754.000 pertsona inguru dira. Komunikatzeko zailtasunak daude azpiegituren egoeragatik, azpiegitura faltagatik eta segurtasun arazoengatik, eta horren ondorioz, nekazaritza eremuak dira kaltetuenak, ezin baitituzte oinarrizko zerbitzuak eskuratu.

Nazioarteko Elkartasuna elkartearen laguntzak honakoak ditu hartzaile: haurdun dauden edo bularreko haurrak dituzten emakumeak, haur txikiak dituzten familiak, adinekoak, mugitzeko zailtasunak dituztenak, gaixoak, zaurituak edo hildakoak dituzten familiak eta etxea suntsitu zaienak.

Laguntzaren bitartez, elikagaiak eta premiazko higiene produktuak emango zaizkie Levy-Mersan 1. sekzio komunaleko 300 laguni, Camp-Perrin, Hegoaldeko departamentuan. Mendian isolatuta dago, eta zaila da bertara iristea.