"Open ispilu" eta "Servirace" proiektuek irabazi dute Open Data Euskadi lehiaketa

BILBO, 14 (EUROPA PRESS)

   "Open ispilu" eta "Servirace, Runner-en gida" proiektuek irabazi dute Eusko Jaurlaritzak datu irekien erabilera sustatzeko antolatzen duen Open Data Euskadi lehiaketa, aplikazioen kategorian.

   Eusko Jaurlaritzak astelehen honetan jakinarazi ditu pasa den urrian deitutako Open Data Euskadi lehiaketan irabazle atera ziren ideiak eta proiektuak. Hain zuzen, lehiaketa horren bitartez, herritarrek Open Data Euskadiren (http://opendata.euskadi.eus) eta datu irekien bestelako iturrien bidez eskura ditzaketen datu publiko irekien erabilera eta berrerabilera sustatu nahi da.

   Sariak bi kategoria ditu. Alde batetik, Open Data Euskadiko datu irekiak berrerabiltzeko lehiaketa dago, iturri horretako datuekin sortutako bi zerbitzu, azterlan eta web edo mugikorrerako aplikazio onenak saritzeko.

   Kategoria honetako irabazleak "Open ispilu" eta "Servirace, Runner-en gida" izan dira. "Open ispilu" proiektuak ispilu arrunta seinaleztapen digitalerako tresna bihurtzen du, eta aukera ematen du open data motako informazio adierazgarria eskaintzeko eguraldiari, ekitaldiei edo albisteei buruz, besteak beste. Proiektuaren helburuko hartzaileak dira datu irekietan oinarritutako informazioa era intuitibo eta bisualean eskaini nahi duten herri administrazioak, elkarteak edo saltokiak. Irontec eta The Makery dira aplikazioaren sortzaileak, eta 3.000 euroko lehen saria irabazi dute.

   Bigarren egitasmo saritua "Servirace, Runner-en gida" da, kirol lasterketa baten kokapenetik gertu dauden zerbitzuen (hotelak, jatetxeak eta abar) gaineko informazioa ematen duena. Datu interesgarriak eskaintzen ditu lasterketa horietan parte hartzen dutenentzat, horien lagunentzat zein lasterketon antolatzaileentzat. Bigarren saria 2.000 eurokoa da, eta proiektuaren arduraduna Anartz Mugika.

BIGARREN KATEGORIA

   Bestalde, Open Data Euskadiko datu publikoak berrerabiltzeko ideien lehiaketan, Open Data Euskadiko edo www.euskadi.eus atariko datuak edozer arlo profesional edo sozialetarako tresna erabilgarrietan erabiltzeko ideiak eman ditzaketen herritarrek har dezakete parte, aplikazioak garatzen aritu ez arren.

   Kategoria honetan, alde batetik, Jeronimo Hernandezen "Hautatu etorkizun oneko ikasketak" saritu dute. Gazteei ikasketak hautatzen laguntzeko informazioa eskainiko dien webgunerako/mugikorretarako aplikazioa sortzea proposatu zuen. Hainbat iturrietako datuak uztartuta, karrera jakin bat amaitu ondoren horri loturiko lana aurkitzeko probabilitatea edo ikasketa bertan behera uzten dutenen indizea ezagutu daitezke. Kategoria horretan, lehen saria 1.500 eurokoa da.

   Bigarrenik, Jon Peyk, Carles Ortolak eta Alberto Rezolak aurkezturiko "iBILI-Lizitazioen bilatzaile adimenduna" saritu dute. Proiektuak teknika matematiko berritzaileak aplikatuko lituzke lizitazio publikoei buruzko informazio adierazgarriena bilatu, aztertu eta bistaratzeko. Gainera, gomendioak ere egingo lizkioke ETEei eta start-up enpresei. Halaber, horien lehiakortasuna areagotuko luke, kontratu publikoak ezagutarazteko plataforma eskaintzen dienez. Saria 1.000 eurokoa da.

   Epaimahaiak, sariok zehazteko, honako alderdi hauek balioetsi ditu aurkeztutako lanetan: erabilgarritasuna, balizko hartzaileen kopurua, bideragarritasuna, gizarteari eransten dion balioa edota ideian oinarritutako negozio bat sortzeko balio ekonomikoa edo balio potentziala, proposamenaren orijinaltasuna, izaera sortzaile eta berritzailea eta argitasuna. Gainera, herritarren iritzia kontuan hartu da, proposamenak bozkatzeko aukera izan duenez.

   Open Data sarien bidez, Eusko Jaurlaritzak helburu zehatz batzuk bete nahi ditu, besteak beste, Open Data Euskadi eta EAEn abiarazitako antzeko ekimenen eta datu katalogoen potentzialaren berri ematea; datu irekien erabilera eta horietatik deribatutako zerbitzuen sorrera sustatzea; sektore berrerabiltzailea sortzen laguntzea, aberastasuna eta gizarte balioak eragiteko; eta sektore berrerabiltzaileak gehien erabiltzen dituen datuak zein diren jakitea, horiek irekitzeko ahalegin gehiago egiteko.