Urola Kostako Udal Elkarteak robotika eta programazio tailerrak antolatu ditu haur eta nerabeentzat

DONOSTIA 6 Mar. (EUROPA PRESS) -

Urola Kostako Udal Elkarteak robotika eta programazioa ulertu eta praktikan jartzeko bi tailer antolatu ditu OpenLab ekimenaren baitan, LH2 eta DBH1 arteko haur eta gazteentzat. Saioak apirilaren 7tik 10era bitarte izango dira, elkartearen egoitza nagusian, Zarautzen (Gipuzkoa), eta parte hartzaileek robotika erabilita erreskate sistemak jarriko dituzte martxan eta 2D plataformako bideojoko bat egingo dute.

Hain zuzen, Urola Kostako Udal Elkartetik jakinarazi dutenez, lantegian erreskate berezietako taldea sortuko dute, eta larrialdi dei bat jaso ostean zauritutako bi lagun erreskatatu beharko dituzte mendikate baten tontorrik altuenetik. Tirolina bat sortu beharko dute erreskatea egiteko. Erronka hori Basque Robot League txapelketarako Doplay-k asmatu eta garatua da.

Era berean, 2Dn plataforma bideojoko bat sortuz, haurrek eta gazteek Pythonekin programazioaren oinarrizko kontzeptuak ikasiko dituzte ongi pasatzen duten bitartean. Jokalariek, oztopoak gainditu, asmakizunak ebatzi eta itemak biltzeko gai den pertsonaia bat kontrolatuko dute. Horretarako Pythonen ekintzak programatuko dituzte. Programazio hizkuntza hau enpresa eta programatzaileen artean munduko liderra da.

Izen-ematea irekita dago jada eta guraso eta arduradunek martxoaren 26ko eguerdira arte egin dezakete. Ikastaroak doakoak dira. https://labur.eus/steamastesantua galdetegia beteta, ekimenaren kudeatzaileak jarriko dira interesdunekin harremanetan.