Zurrunbilo euskarazko arte eszeniko garaikideen 10. jaialdia hasiko da astearte honetan Gasteizen

BARATZA ARETOA

GASTEIZ 25 Mar. (EUROPA PRESS) -

Zurrunbilo jaialdiak hamargarren edizioa ospatuko du Gasteizen astearte honetatik igandera, martxoaren 25etik 30era, nobedadeekin eta euskarazko arte eszeniko garaikideen egitarau zabalarekin.

Berritasunak izan arren, jaialdiaren arduradunek iragarri dute hasierako helburuei eusten dietela, hau da, publiko berriengana hurbildu, tokiko konplizitatea sortu eta beste lurralde historikoetako beste programa eszeniko batzuekin loturak sortzen saiatzea.

"Hori guztia diziplinarteko ikuspegi batetik, hitza, antzerkia, dantza, performancea eta beste lengoaia batzuekin nahastuz", adierazi dute.

Parasite Kolektiboak antolatzen du Zurrunbilo jaialdia, Baratza aretoaren, Gasteizko Udalaren, Arabako Foru Aldundiaren, Eusko Jaurlaritzaren eta Laboral Kutxaren laguntzarekin. Gainera, edizio honetan Garaion Sorgingunea eta Izaskun Arrue Kulturgunea aritu dira elkarlanean.

Bada, jaialdiaren hamargarren edizioa berrikuntza batekin hasiko da, Baratza eta Izaskun Arrue Kulturguneak antolatuta Parasite Kolektiboak eta Tripak konpainiak eskainiko duten 'Kalejira performatikoa' tailerrarekin, hain zuzen ere, astearte honetatik ostegunera, martxoaren 25etik 27ra.

Zurrunbilo Ozaetako Garaion Sorgingunera joango da ostegunean, martxoaren 27an, eta 'Dounia eta Alepoko printzesa' filma ikusi ahal izango da bertan. Marya Zarif artista eta idazlearen ipuin batean oinarritutako animaziozko filma da. Siriar familia baten ihesa eta erbestealdiaren esperientzia kontatzen du, neskato baten begiradatik. Emanaldia Kalakalab eta Zinhezbak antolatu dute.

Orobat, Metrokoadroka kolektiboak & Don Inorrez taldeak 'Aztia' aurkeztuko dute Baratza aretoan ostiralean, martxoaren 28an, musika, antzerki bakarrizketa eta butoh dantza uztartzen dituen kontzertu dramatizatua. Taula gainean, Ainhoa Alberdi, Karlos Arancegui, Oier Guillan eta Imanol Ubeda egongo dira, "umorez eta doinu kutsakorrez gain".

EGUN HANDIA

Zurrunbilo jaialdiaren hamargarren aldiko egun handia larunbata izango da, martxoaren 29a, hiru ikuskizunekin. Tripak taldeak 'Platea' heriotzaren eta bizitzaren artean gertatzen denari buruzko hausnarketa existentziala aurkeztuko du 19:00etan Baratzan, umoreari eta absurdoari tartea eginez.

Ondoren, 'Kalejira performatikoa' tailerreko partaideek kalejira performatiboa egingo dute 20:30ean Baratzatik Izaskun Arrue Kulturgunera, 21:00etan Antuxunaren 'Baninduaien kantatzera' folk teknologikoko saioan izateko: ikus-entzunezko emanaldia da, euskal kantategi zaharraren birmoldaketa elektroniko eta guztiz digitala, zuzeneko musika, LED argiak eta proiekzioak uztartzen dituena.

Jaialdiaren hamargarren edizioaren amaiera igandean izango da, martxoaren 30ean, 19:00etan, Baratzan, prostituzioa eta osasun mentala gai nagusitzat hartuta Laura Penagosek esakainiko duen 'Puta bakarrizketa eroetxean' bakarrizketarekin.

Sarrerak 10 euro balio du (12 euro leihatilan) eta bi bonu egongo dira: bata larunbateko ikuskizun guztiak ikusteko (13 euro), eta bestea jaialdi osorako (28 euro).

Zurrunbiloko ikuskizunetarako sarrerak eskuragarri daude https://bibe.me/eventos-baratza-aretoa webgunean, eta jaialdiaren inguruko informazio guztia https://salabaratza.com/es/ciclos/zurrunbilo/2025 webean. Sarrera soziala ere eskuragarri izango dute bertaratu nahi eta ekarpenik egin ezin dutenek (salabaratza@gmail.com).