SANTIAGO DE COMPOSTELA 9 Nov. (EUROPA PRESS) -

Un grupo de investigadores da Universidade de Santiago (USC) e do Complexo Hospitalario Universitario de Santiago (CHUS) traballan na busca de todas as mutacións xenéticas que poden desencadear a morte súbita, tanto en adultos coma en nenos menores dun ano.

"O que facemos é estudar a base xenética da morte súbita coa finalidade de poder coñecer as causas que a provocan", explicou a coordinadora do proxecto, María Brión.

A investigación comezou despois de coñecerse que nos casos de non só morte súbita, senón tamén desmaios, paradas ou síncopes, hai xenes implicados,

Brión comentou que na actualidade hai dúas liñas de traballo abertas; unha orientada cara aos casos dos adultos novos menores de 35 anos e outra centrada nos nenos menores dun ano.

O equipo traballa en colaboración constante con hospitais e institutos de Medicina Legal, que son os que lles envían os casos de pacientes que faleceron de morte súbita. "Este punto é moi importante, pois é grazas ao estudio dos casos que aconteceron como podemos atopar as causas", explicaron.

ESTUDAR O XENOMA

Por iso, sinalaron que "é interesante" que todos os hospitais e centros forenses estean ao tanto da investigación da USC e CHUS "para que se nalgún momento reciben un destes casos, permitan contactar cos seus familiares para obter o consentimento de estudar o xenoma", precisou Brión.

A coordinadora do proxecto recalcou a importancia da prevención, de forma que se algunha familia sofre algunha destas patoloxías e tivese risco de sufrir morte súbita, dispoña de desfibrilador.

"Sería posible mesmo que os adultos novos levasen un desfibrilador no caso de que o corazón sufrise algunha parada", sentenciou e precisou que en España "aínda que se fan controis médicos, non inclúen exames xenéticos que poderían axudar a reducir os casos".