VIGO, 25 Mar. (EUROPA PRESS) -

Un mínimo de 10.000 pacientes poderán beneficiarse anualmente do proxecto Hygia, un programa pioneiro na loita contra a hipertensión arterial creado pola Universidade de Vigo e ao que se incorporarán en breve centros de Estados Unidos, Italia, Turquía, India e China.

Hygia é unha rede na que, ata agora, se integraban centros de atención primaria e hospitais de toda Galicia, co obxectivo de mellorar a valoración diagnóstica dos pacientes hipertensos e lograr establecer o mellor esquema terapéutico así como o grao de control. Desta forma, diminúese o risco de problemas cardiovasculares.

O programa naceu hai case un ano e, a partir da próxima semana, incorporaranse os citados países, a través dunha versión en inglés da iniciativa.

Segundo explicou o catedrático Ramón Hermida, principal responsable do proxecto e director do Laboratorio de Bioingeniería e Cronobiología de la Escuela de Inxeniería de telecomunicación, o programa obtivo un crecemento "tremendamente rápido", posto que hai 10 meses en Galicia só funcionaban seis centros, mentres que "agora están a funcionar 31".

Ata este momento, valoráronse máis de 1.500 pacientes exclusivamente na comunidade e hai 170 investigadores implicados. Coa ampliación a nivel internacional, poderase falar de "varios millares de pacientes anualmente", indicou o profesor.

INFORME

O proxecto permite obter un informe estandarizado dos pacientes hipertensos, aos cales se fai unha monitorización ambulatoria. Este proceso realízase de forma 'on-line', dende uns servidores situados na escola universitaria de Telecomunicacións.

Coa internacionalización desta iniciativa, a coordinación continuará realizándose dende Vigo, polo que "toda a información técnica para a valoración e a tramitación de informes se farán integramente aquí", destacou Hermida.

A expansión foi froito do boca a boca e polo amplo número de contactos do grupo vigués a nivel internacional. Ademais dos países cos que se amplía a rede, recibíronse chamadas de interesados dende países de Oriente Medio e América Latina.