A Xunta destina un millón de euros a proxectos tecnolóxicos relacionados co Xacobeo 2010

SANTIAGO DE COMPOSTELA 28 Dic. (EUROPA PRESS) -

A Consellería de Economía e Industria destinará axudas por valor dun millón de euros a proxectos levados a cabo por empresas galegas co obxectivo de desenvolver produtos e servizos tecnoloxicamente innovadores en relación co Xacobeo 2010.

En total, a iniciativa financiará dez proxectos destinados a dar soporte aos turistas e peregrinos durante o Ano Santo a través das Tecnoloxías da Información e a Comunicación (TIC), con actuacións como aplicacións móbil para a localización ou xeorreferenciación e ferramentas de web 2.0 tales como as redes sociais.

Así mesmo, valorouse especialmente para a concesión destas axudas a innovación tecnolóxica relacionada coa creación de contidos e plataformas virtuais para a promoción do Xacobeo 2010 e a posta en valor do patrimonio artístico, histórico e cultural.

Ademais, contarán con apoio os proxectos relacionados coas infraestruturas tecnolóxicas e ferramentas para a creación, difusión e mellora de servizos audiovisuais de interese para a promoción do Xacobeo, as actuacións que permitan mellorar as tecnoloxías de restauración e estudio de elementos históricos e artísticos vinculados ao Ano Santo e aqueles proxectos que permitan dar un impulso á innovación e mellora da competitividade da oferta turística.