Aberto o prazo para a incorporación de 25 novos centros escolares ao plan de mellora de bibliotecas

SANTIAGO DE COMPOSTELA 21 Abr. (EUROPA PRESS) -

A Consellería de Educación, Universidade e Formación Profesional publicou no Diario Oficial de Galicia (DOG) a convocatoria anual para a incorporación de 25 novos centros escolares ao Plan de Mellora de Bibliotecas Escolares Plambe para o próximo curso 2019/2020.

Trátase dunha iniciativa dotada con 1,34 millóns de euros para o apoio aos novos centros que se somen ao programa, así como para a continuidade por parte dos centros que se foron incorporando nas anteriores convocatorias.

Así, segundo explicou a Xunta nun comunicado, as axudas para as novas incorporacións estarán destinadas á actualización dos fondos documentais da biblioteca escolar, á renovación do mobiliario e outro equipamento necesario, así como a outros gastos de funcionamento.

A adxudicación decidirase após unha análise das necesidades descritas na solicitude presentada, en función da maior adaptación aos criterios recollidos nesta orde e das características de cada centro. Así mesmo, en igualdade de puntuación, Educación dará preferencia a aqueles centros situados no ámbito rural.

ANTERIORES CONVOCATORIAS

No caso dos centros incorporados con anterioridade, os que o fixeron entre 2005 e 2010 poderán recibir asignacións para fondos; os que se integraron entre 2011 e 2013 recibirán asignacións para fondos e para mobiliario e outros equipamentos; os centros adscritos entre 2014 e 2017 terán contías para fondos, e os incorporados o ano pasado para fondos, mobiliario e outros equipamentos, así como para gastos de funcionamento específicos da biblioteca.

"O Plambe ten como obxectivo incentivar e impulsar o desenvolvemento de proxectos de biblioteca escolar que procuren a dinamización deste espazo como un centro de recursos de lectura, información e aprendizaxe", destacou o Executivo autonómico.