Barreiro descoñece actuacións xudiciais contra el e nega ter feito "ningún tipo de xestión" a favor de coñecidos

LUGO, 19 Jun. (EUROPA PRESS) -

O presidente do PP de Lugo e voceiro do Grupo Popular no Senado, José Manuel Barreiro, asegurou que non dispón de "ningún tipo de comunicación, nin oficial nin extraoficial, de ningún xulgado" acerca de actuacións xudiciais contra el, pero negou ter feito "ningún tipo de influencia ou xestión" a favor de persoas próximas.

O Tribunal Supremo estuda se admite trámite e investiga unha causa por tráfico de influencias e por delito contra a administración pública contra José Manuel Barreiro, a raíz da remisión dunha exposición razoada por parte do Xulgado de Instrución número 2 de Lugo.

Segundo informaron a Europa Press fontes xudiciais, o Xulgado de Instrución Número 2 de Lugo recibiu unha peza separada dunha causa declarada secreta, polo que se abriron dilixencias en relación a José Manuel Barreiro. Estas dilixencias apoiáronse sobre manifestacións realizadas por dúas persoas, unha das cales, segundo fontes xudiciais, foi o empresario lucense Jorge Dorribo, principal imputado na 'Operación Campeón'.

O xornal 'La Voz de Galicia' publica este mércores que a exposición razoada elevada ao Supremo parte de que Jorge Dorribo acusaría a Barreiro de supostamente facilitar a unha empresa participada por un primo seu o prego de condicións do concurso de adxudicación do párking do novo hospital de Lugo antes de que fose público.

Barreiro asegurou a Europa Press que esas acusacións son "falsas". "Todo canto se di é falso, que facilitase ningún tipo de prego, que fixese ningún tipo de influencia ou xestión. É rotundamente falso", aseverou.

"O meu descoñecemento é total e absoluto", agregou o político popular, quen indicou que a información que ten "é a través dos medios de comunicación". Por iso, confesa que se sente "desamparado", habida conta de que "non sabe qué actuacións ten que tomar".

Posteriormente, Barreiro tamén ratificou que adoptará "as accións legais oportunas" contra Jorge Dorribo "de confirmarse que efectivamente" o acusou en sede xudicial de calquera irregularidade, extremo que aínda descoñece, xa que non recibiu comunicación "de ningunha instancia xudicial".

"INDEFENSIÓN"

Barreiro afirmou que consultará con "avogados" para que o orienten ante as accións que debe emprender e posto que se atopa ante "unha indefensión total e absoluta, derivada deste descoñecemento" sobre as accións xudiciais que estarían en marcha contra el.

En calquera caso, Barreiro sostivo, en declaracións a Europa Press, que está "total e absolutamente tranquilo", posto que ten "a conciencia tranquila". "Sen ningún problema", sinalou a este respecto.

Non obstante, si admitiu que é un "tema que é molesto" o de "decatarse a través dun medio de comunicación dunha suposta actuación xudicial", da que, insiste, carece de todo tipo de constancia oficial ou formal de que sexa así. "Eu non teño que ver na actuación que supostamente di este señor que eu cometín", reiterou finalmente o voceiro dos populares no Senado.