Besteiro fixa nas municipais do 2027 "a primeira meta" do PSdeG: "Será un ano positivo para o PSOE"

   SANTIAGO DE COMPOSTELA, 15 Nov. (EUROPA PRESS) -

   O secretario xeral do PSdeG, José Ramón Gómez Besteiro, fixou "a primeira meta" dos socialistas galegos nas eleccións municipais do ano 2027, que afronta, asegurou, con perspectivas positivas e coa confianza de que será "un ano positivo para o PSOE, para Galicia e para España".

   "É un proceso de ir avanzando na procura de atopar aos mellores candidatos, unha posición de referencia de cara ao conxunto da sociedade, en definitiva, unha posición que nos refire como un partido claramente municipalista", proclamou ante máis de 140 militantes inscritos no Comité Nacional que se celebra este sábado en Santiago.

    Ademais, Besteiro reivindicou que o PSOE é "a alternativa á dereita en Galicia" fronte a un PPdeG "cómodo" co BNG como líder da oposición. Tamén acusou aos populares galegos de asumir discursos que rompen "pactos básicos" como, engadiu, "o consenso contra a violencia machista", ante o que insistiu que o PSOE é "o único dique de contención".

   Tamén avanzou que convocará antes de final de ano o Consello de Alcaldes e Alcaldesas para "analizar e tomar decisións sobre o ataque furibundo que se lle está facendo ao mundo local por parte do PP".

   "Necesitamos a todos neste proxecto, non sobra ninguén", manifestou o líder socialista, que este sábado cumpre anos e soprou as velas ao final da súa intervención ante o aplauso dos militantes presentes neste Comité Nacional.

(HABERÁ AMPLIACIÓN)