Besteiro nun audio distribuído aos medios: "Eu creo en Zapatero e a Zapatero"

   SANTIAGO DE COMPOSTELA, 20 May. (EUROPA PRESS) -

   O secretario xeral do PSdeG, José Ramón Gómez Besteiro, saíu este mércores en defensa do primeiro expresidente do Goberno español investigado por un caso de corrupción ao proclamar, nun audio distribuído aos medios de comunicación: "Eu creo en Zapatero e a Zapatero".

   O audio, de 47 segundos de duración, foi distribuído despois de que a mañá do martes, tras transcender a investigación ao expresidente do Goberno, o PSdeG cambiase unha convocatoria de prensa para anular a presenza de Besterio e de que a mañá deste mércores o dirixente socialista se ausentase da sesión de control parlamentario ao presidente da Xunta, co argumento de que non lle correspondía formular pregunta a Alfonso Rueda.

   No seu lugar, e aínda que non figuraba na súa axenda pública, Besteiro foise a mañá deste mércores a estrear o novo horario Alvia Lugo-Madrid.

   Na liña coas mensaxes dos seus compañeiros de filas socialistas, Besteiro lembra no seu audio "o que significou para España e tamén para Galicia" o Goberno de Zapatero, que resume en "dereitos, liberdades e avances sociais que cambiaron a vida de millóns de persoas".

   O líder dos socialistas galegos expresa o seu "máximo respecto á xustiza", á vez que reclama a "máxima prudencia" ante un procedemento xudicial "que está aínda na súa fase inicial".

   "Pero tamén firmeza. Firmeza para dicir que o presidente Zapatero merece ser tratado coa presunción de inocencia que ampara a calquera cidadán. Porque en Galicia, e eu especialmente, sabemos perfectamente o que iso significa", agrega Besteiro en referencia velada ás operacións xudiciais nas que el mesmo se viu envolto e que provocaron a súa saída de esfera pública, ata que quedaron arquivadas e puido volver á política activa.

   Aproveita tamén o dirixente socialista para reafirmar a idea do presidente do Goberno, Pedro Sánchez, de que non se producirá un adianto das eleccións estatais ao ironizar con que "o PP non debe ver moi seguras as eleccións do ano 27 cando recorre a este tipo de armamento político".