BNG afea que o Goberno de Rueda "favorece ás empresas" e "non achega solucións aos problemas reais"

   SANTIAGO DE COMPOSTELA, 22 Feb. (EUROPA PRESS) -

   A viceportavoz do BNG no Parlamento, Olalla Rodil, acusou ao presidente da Xunta, Alfonso Rueda, de levar dous anos "favorecendo o negocio dun puñado de empresas, sen achegar solucións aos problemas reais" que lle preocupan aos galegos.

   Nun audio difundido aos medios de comunicación, Rodil fixo balance da lexislatura de Rueda, asegurando que é un PP "instalado no ruído e na crispación". "Vai pasar á historia por ser o máis antigallego e centralista, sempre servil ás ordes do PP de Madrid en contra dos intereses dos galegos", asegurou a deputada do Bloque.

    Así, indicou que proba disto é o rexeitamento do Goberno do PP á condonación da débeda negociada polo BNG no acordo de investidura. Máis de 4.000 millóns de euros que poderían "servir para mellorar os servizos públicos, cada vez máis deteriorados".

   Neste sentido, Olalla Rodil criticou a negativa de Rueda a negociar un sistema de financiamento xusto para Galicia, a través dun concerto que lle dea aos galegos a chave do seu diñeiro.

   Para a deputada do BNG, desde a celebración das últimas eleccións galegas deixouse claro que o estilo de Rueda é o dun Goberno que "traballa para un puñado de empresas amigas do PP", ás que "se lle pon en bandexa os recursos e a riqueza de Galicia para que poidan seguir aumentando os seus beneficios".

   Concretamente, a nacionalista galega referiuse ao "boom eólico depredador, pensado para favorecer os intereses das eléctricas", ou as políticas feitas para "beneficiar ao lobby do eucalipto".

    "Aínda que o exemplo máis claro é o de Altri, en Palas de Rei. O Goberno do PP foi o gran impulsor deste proxecto absolutamente prexudicial para Galicia", remarcou, ampliando que se finalmente non se chega a material será "grazas á masiva mobilización veciñal e social".

"TRABALLA DE COSTAS Á XENTE"

   A viceportavoz do BNG no Parlamento ah afeado o "triunfalismo" do mandatario autonómico á hora de facer balance dun Goberno que, insiste, "traballa de costas á xente e sen atender os seus problemas reais".

   Nesta liña, referiuse á situación que atravesa a sanidade pública, coa Atención Primaria "en estado crítico", listas de espera de até quince días para ver a un médico ou "11.000 nenos sen pediatra asignado". Ademais, tamén aludiu ao "fracaso da súa xestión" en materia de vivenda, sendo hoxe o "principal factor de exclusión social".

   "É imposible poder pagar o aluguer, cada vez máis caro neste País, entre outras cousas porque o Partido Popular dinamitou durante o últimos dezaseis anos a política social de vivenda", salientou.

   A maiores, Rodil citou a situación do sistema de dependencia, co Servizo de Axuda non Fogar (SAF) "colapsado e listas de espera inadmisibles" que "favorecen ás empresas, como ocorre coas residencias".

   En contraposición, a nacionalista galega remarcou o traballo da súa formación, que despois de "alcanzar o mellor resultado nas últimas eleccións", continúa traballando como alternativa de Goberno, "cada día con máis ilusión e forza para dar resposta, solucións e esperanza aos galegos".