O BNG pide ao PPdeG que non impida a comisión de investigación sobre Altri: "Se nada teme, que medo hai?"

   SANTIAGO DE COMPOSTELA, 9 Mar. (EUROPA PRESS) -

   A viceportavoz do BNG Olalla Rodil insistiu en demandar ao Grupo Popular que apoie a comisión de investigación sobre a tramitación do proxecto de Altri que se debaterá este martes na Cámara galega.

   "Se non hai nada que ocultar, se nada se teme, que medo hai a que se constitúa esta comisión?", cuestionou en rolda de prensa este luns no Parlamento.

   A este respecto, Rodil lembrou que a Xunta "comezou mentindo desde o minuto 1", dicindo, apuntou, que o proxecto que a multinacional lusa quería instalar na comarca da Ulloa "ía ser unha biofábrica" e que despois das eleccións "sóubose que era unha enorme fábrica de celulosa".

   Neste contexto, puxo o foco en que "se ocultou información relevante" ao Parlamento, en concreto, "o acordo secreto da Xunta, a través de Impulsa, e Altri en outubro de 2021". "Ese memorando de entendemento asinado en outubro de 2021 contiña unha serie de condicións previas. Que condicións eran esas?, que compromisos adquiriu a Xunta con Altri nese acordo secreto?, que contrapartidas asumiu o Goberno galego coa empresa portuguesa?", subliñou Rodil.

   Neste sentido, sinalou que a Xunta "denegou en tres ocasiones o acceso a esta documentación ao BNG" que, salientou, "non parará até coñecer a verdade".

   Ademais, a viceportavoz do BNG criticou que a Xunta "deu carpetazo ao proxecto" da multinacional lusa e "non hai un só documento público que avale ese arquivo". Unha comunicación que se fixo "na véspera de coñecer a sentenza que declara ilegal a decisión da Xunta de excluír unha parte da Serra do Careón na zona de amortecemento de Rede Natura".

   "O goberno do PP nin sequera motivou esa exclusión, cuxo único obxectivo era que Altri conseguise unha declaración de impacto ambiental que sen desprotexer esa parte da zona de amortecemento de Rede Natura sería imposible", reprochou.

   Por todo iso, dixo esperar que todos os grupos apoien esta comisión que "esclareza que ocorreu durante a tramitación do proxecto de Altri".

   Preguntada sobre se os nacionalistas se arrepentían de gastar coa comisión de investigación da adxudicación de Hospital Álvaro Cunqueiro a opción que lle dá ter polo menos un terzo dos asentos no hemiciclo do Pazo do Hórreo para crear comisións de investigación, Rodil negouno, argumentando "a gravidade dos feitos que se coñecían" tras o informe do Conselllo de Contas sobre o financiamento da obra.

   Para ela, "o grave" é que a forza política maioritaria na Cámara "utilice esa maioría para bloquear a posibilidade de coñecer información tremendamente importante".

   "Pido recapacitar ao PP e que non a bloquee utilizando o rodete da maioría absoluta e bloqueando o acceso a información publica de todos os galegos", remarcou.

DECLARACIÓN INSTITUCIONAL

   Doutra banda, Olalla Rodil trasladou que o BNG enviou a todos os grupos a súa proposta de declaración institucional de condena da guerra de Estados Unidos e Israel en Irán.

   Para o Bloque, trátase dunha agresión "ilegal que non pode verse como un feito illado", enmarcada "na política imperialista de EEUU e os seus aliados". "Os mesmos que bombardearon case unha ducia de países, que secuestraron a un presidente como o de Venezuela e os mesmos que levan cometendo un xenocidio contra o pobo palestino", resumiu.

   Ante esta situación, defendeu que o BNG reivindica o "non á guerra", pero reclamou aos gobernos de Xunta e Estado "accións que vaian máis aló do slogan e da soflama". "Hai que encher de contido ese non á guerra", reflexionou.

   Así, tal e como lembrou, a declaración dos nacionalistas pide á Cámara "condenar firmemente a agresión militar", facer un chamamento á comunidade internacional, á Unión Europea, ao Goberno e á Xunta para que adopten medidas concretas "encamiñadas a frear a escalada bélica" e "recuperar vías de diálogo".

   Tamén demanda rexeitar "as ameazas de Trump" e esixe ao Executivo central que "poña fin á presenza militar norteamericana en España", así como ao uso do territorio galego "como base de infraestruturas e actividades da OTAN", da que pide a súa saída, e o rexeitamento ao envío de medios materiais de guerra en zona de conflito.

ADXUNTO Á VALEDORA

   Por outra banda, Olalla Rodil reafirmou que o BNG mantén ao profesor de Dereito Administrativo Fernando de Abel Vilela como o seu candidato para ser designado adxunto á valedora do Pobo, María Dores Fernández Galiño.

   "É un gran candidato que cumpre escrupulosamente todas as obrigacións legais, traxectoria académica, profesional e social intachable, que o avalan mellor que ningunha outra persona para formar parte desta institución", reivindicou.

   Así, lamentou que o PPdeG "faga saltar polo aire os consensos democráticos" e que, "de maneira insólita", vaia "en contra da segunda forza política desta Cámara", unha posición que, engadiu, "sitúa ao BNG en disposición de nomear á persoa adxunta á valedora".

   "Dá conta da concepción que ten do poder o PP. Ten maioría absoluta, pero non lle deron un poder absolutista e ten que respectar o pluralismo e a democracia", insistiu a viceportavoz do BNG.