O BNG pon o foco na situación xudicial dun dos 9 novos deputados do PP após a súa toma de posesión

   SANTIAGO DE COMPOSTELA, 14 May. (EUROPA PRESS) -

   A toma de posesión dos nove deputados do Partido Popular que fixeron efectivo o seu ingreso no Pazo do Hórreo este martes estivo marcada polas palabras do deputado do BNG, Iago Tabarés, que puxo o foco na condición de investigado dun deles por un xulgado ourensán.

    As palabras de Tabarés, en alusión velada (non pronunciou o seu nome) á investigación ao desde este martes parlamentario do PP por Ourense Juan Manuel Casares pola súa xestión á fronte do Consello Regulador do Ribeiro, provocou a reacción do presidente do Parlamento, Miguel Ángel Santalices, que reprendeu ao nacionalista por un comentario que, para o titular do Lexislativo, non fora procedente.

    E é que o deputado frontista convidara ao novo membro do Grupo Popular a trasladar ao xulgado que o investiga, segundo apuntaron fontes próximas ao caso a Europa Press, por un caso de falsidade documental que co seu ingreso na Cámara pasa a ter a condición de aforado, polo que a súa causa debe pasar a mans do Tribunal Superior de Xustiza de Galicia.

    En concreto, estas mesmas fontes apuntan que o caso responde o "despedimento" do exalcalde de Castrelo de Miño (Ourense) Xurxo Rodríguez Méndez do seu posto como traballador do Consello Regulador do Ribeiro, entidade que Juan Manuel Casares presidía até a súa renuncia para asumir a acta de deputado do PP da que tomou posesión este mesmo martes. Consultado por Europa Press, o PP declinou entrar en consideracións sobre o asunto.

NOVOS DEPUTADOS

   As palabras de Tabarés sobre a situación xudicial do novo deputado por Ourense da bancada popular producíronse co inicio do debate parlamentario nunha sesión que arrincou, precisamente, coa asunción da acta do nove deputados do PP que asumen as vacantes deixadas por persoas elixidas para ocupar postos no Goberno galego ou polo seu paso ao senado.

    En concreto, entraron no Pazo do Hórreo Paula Mouzo pola provincia da Coruña; Encarna Amigo e Nicole Grueira pola provincia de Lugo; José Luís Ferro, Victor Valadrón, Cristina Campero e Juan Manuel Casares, pola de Ourense; así como Manuel Fidalgo e Felisa Rodríguez, pola de Pontevedra.

   Grueira, presidenta de Novas Xeracións desde novembro de 2023, ano no que foi a candidata máis nova en optar a unha Alcaldía en Galicia; converteuse así na primeira deputada da historia do Parlamento de Galicia nacida no século XXI.

   Pola súa banda, Paula Mouzo, Encarna Amigo, José Luís Ferro e Felisa Rodríguez regresan á Cámara autonómica após ser deputadas na pasada lexislatura concluída finais de 2023. O resto son caras novas, aínda que algún, como o vigués Miguel Fidalgo, xa foi Senador en tres lexislaturas consecutivas.