A Cámara condena a agresión mortal de Sanxenxo: "A loita contra a violencia é un partido que xogamos todos"

   SANTIAGO DE COMPOSTELA, 26 Feb. (EUROPA PRESS) -

   O Parlamento de Galicia sumouse este mércores ás mostras de repulsa da sociedade galega pola morte de Andrés Rico, o home que faleceu fai días a consecuencia da agresión sufrida en decembro mentres asistía como público a un partido de balonmán formativo que arbitraba o seu neto.

   "A loita contra a violencia é un partido que xogamos todos", proclama a declaración institucional lida polo presidente do Lexislativo autonómico, Miguel Ángel Santalices, durante a sesión plenaria que se retomou na mañá deste mércores no Pazo do Hórreo.

   O Parlamento tamén fixo seu o manifesto promovido polas 59 federacións deportivas galegas e que será lido en pavillóns, campos e estadios de Galicia durante esta fin de semana para apelar a erradicar a violencia dos deportes.

   Após manifestar as súas condolencias para familia e achegados de Andrés Rico, o texto expresa a súa repulsa por uns feitos, ocorridos o 15 de decembro nun pavillón de Vilalonga, que mostran "o lado máis escuro" do deporte e "que non se debe, que non se pode, repetir baixo ningún concepto".

   A declaración é unha chamada a "actuar de forma firme e unida ante a violencia" e a converter o deporte en "un espazo de comuñón e amizade, non de separación e de odio" porque vai "moito máis alá" dunha actividade física ao constituír "un mecanismo de evasión, unha fonte de saúde, unha terapia psicolóxica e, para moitas persoas, un medio de vieda".

   "Desde o Parlamento de Galicia cremos nun deporte plural, diverso, sen xénero nin idade, para todos e para todas, enriquecedor da soceidad, transmisor de valores, xerador de noticias, transformador, igualador, motor de cambio social e tamén axente económico determinante", reivindica o texto.

   Para canalizar estes obxectivos, avogan por eliminar "calquera manifestación da violencia" do deporte, para o que subliña o compromiso de institucións e administracións a "reforzar" tanto a atención como os mecanismos para velar por iso.