As lapas nas Fragas do Eume reabren o debate sobre a prevención no parque natural

    FERROL, 23 Jun. (EUROPA PRESS) -

   O incendio rexistrado dende a madrugada do martes no Parque Natural das Fragas do Eume, no municipio coruñés da Capela, ten reavivado o debate sobre as políticas de prevención e xestión forestal neste espazo protexido.

   A 'Asociación Parque Natural do Eume: Natureza e Desenvolvemento' expresou este martes a súa solidariedade cos veciños afectados e o seu recoñecemento aos equipos de extinción que traballan para controlar o lume nun dos principais bosques atlánticos de Europa.

   Aínda que esta entidade fala nun comunicado de que o lume do pasado domingo no municipio coruñés da Capela tamén tería afectado ao Parque das Fragas do Eume, segundo o perímetro do incendio, que xa está controlado, as lapas non chegaron a afectar á zona protexida na parroquia de Vilariño, segundo confirmaron fontes oficiais a Europa Press.

   Ao mesmo tempo, a entidade reclamou explicacións sobre as medidas de prevención de incendios existentes no parque e lembrou que esta cuestión foi exposta recentemente no Parlamento de Galicia sen que, ao seu xuízo, recibise unha resposta concreta por parte da Xunta.

   Segundo a asociación, dous deputados autonómicos formularon en maio unha pregunta escrita ao Goberno galego sobre as actuacións previstas para reforzar a prevención de incendios e garantir a seguridade das persoas no espazo natural. A organización sostén que a contestación se limitou a referencias xerais sobre adquisición de parcelas e restauración ecolóxica.

OS PROPIETARIOS

   A entidade tamén sinalou que propietarios e veciños da contorna levan tempo reclamando unha maior participación na xestión do parque e advertiu de que a acumulación de combustible forestal pode incrementar o risco de incendios se non existe unha xestión adecuada do monte.

   A asociación evitou atribuír responsabilidades sobre a orixe dos lumes, cuxa causa deberá ser determinada pola investigación correspondente, aínda que insistiu na necesidade de analizar as medidas de prevención unha vez finalicen os labores de extinción.

   Os incendios declarados na Capela afectaron a unha parte do Parque Natural das Fragas do Eume.