Dun a tres anos de prisión, pena de cárcere polo furto dun obxecto con valor patrimonial como o Códice

SANTIAGO DE COMPOSTELA, 5 Jul. (EUROPA PRESS) -

Dun a tres anos de prisión é a pena recollida no Código Penal polo furto dun obxecto con valor patrimonial como o Códice Calixtino, recuperado o mércores nun trastero tras permanecer desaparecido dende o 5 de xullo de 2011.

En declaracións a Europa Press, o decano do Colexio de Avogados de Santiago, Evaristo Nogueira, explicou que, coa "cautela dun procedemento" aberto, por un furto agravado, a pena situaríase entre un e tres anos de cárcere, mentres que un furto normal sería entre seis e 18 meses.

Ademais, aclarou que no caso de persoa sen antecedentes se a pena de cárcere non supera os dous anos de prisión "se pode suspender" a súa execución e non chegar a ingresar en prisión.

Nogueira, que pasou este xoves pola poboación coruñesa de Milladoiro onde foi atopado o Códice Calixtino, comentou, ademais, aos medios que "dende o punto de vista obxectivo a teor das penas previstas no Código Penal se se considera isto un delito de furto a pena prevista está entre un ano de prisión e tres anos".

Preguntado sobre o procedemento, o decano do Colexio de Avogados de Santiago sinalou que será "totalmente ordinario" e haberá un proceso de instrución, que rematará na apertura dun xuízo oral. "Alí debaterase a culpabilidade ou non culpabilidade das persoas que neste momento poidan estar detidas", engadiu.

Sobre a posibilidade de que se consideren varios delitos de furto de patrimonio, Nogueira manifestou que se podería falar "de varios delitos de furto ou dun delito de furto continuado". "Se é un delito de furto continuado, a pena podería chegar ata seis anos de cárcere e se fosen delitos separados, habería que sumar as penas", puntualizou.

RELIXIOSO

O electricista detido como presunto ladrón do Códice Calixtino é un home que, segundo persoas do seu ámbito, destaca pola súa relixiosidade e pola súa vinculación á Catedral de Santiago.

Así, sinalaron que é un home cunha forte convicción relixiosa e que acudía frecuentemente a oír misa á Catedral, onde traballou durante 25 anos.

A parte da pena de prisión que pedirán para o principal acusado de subtraer o Códice, o propio libro advirte do castigo da excomuñón para "quen o leve ou roube da basílica" na que estea depositado, así como para "o que molesten aos seus portadores".

Este castigo está recollido nunha carta incluída nos apéndices que forman parte do Códice Calixtino, atribuída ao Papa Inocencio II, segundo explicou a Europa Press o profesor Xosé López, autor da única tradución completa ao galego do texto.