Feve habilita un 'tren buho' para enlazar Ferrol con Ortigueira durante o Festival do Mundo Celta

FERROL, 9 Jul. (EUROPA PRESS) -

Feve habilitará este ano durante o Festival do Mundo Celta un 'tren buho' que enlazará Ferrol coa localidade de Ortigueira, o venres e o sábado, e que se sumará aos 32 trens especiais que circularán ata o domingo e que o pasado ano foron utilizados por máis de 5.000 pasaxeiros.

O tren nocturno especial circulará tanto na madrugada do venres ao sábado, coma na do sábado ao domingo. Sairá de Ortigueira ás 01.45 horas, co obxectivo de favorecer o regreso aos que acudan aos concertos nocturnos, pero non pasen a noite na localidade. De momento, trátase dunha primeira experiencia, que Feve non descarta ampliar con máis servizos para próximas edicións.

O 'tren buho' súmase aos 32 trens especiais habilitados por Feve durante os catro días do Festival. O xoves e o venres, saen dende Ferrol ás 17.15 e 22.00 horas, e dende Ortigueira, ás 19.10 e ás 23.15. O sábado e o domingo, partirán de Ferrol ás 09.00, ás 13.45, ás 16.11 e ás 21.11, e de Ortigueira, ás 12.00, ás 15.00, ás 19.10 e ás 22.40 horas.

O luns, ao día seguinte do termo do Festival, o tren especial sairá de Ferrol ás 9.50 e ás 17.10 horas e de Ortigueira, ás 12.30 e ás 19.10.

Os trens especiais teñen parada en Xuvia, San Sadurniño, Cerdido e Ponte Mera, mentres que os regulares efectuarán parada nas estacións e apeadeiros habituais do seu percorrido.

CAPACIDADE

Ademais, Feve incrementou a capacidade de cada un dos trens especiais, que contarán con 300 prazas. Desta forma, a directora de Proximidades e Rexionais de Feve, Diana González, mostrou a súa confianza en que este ano se supere a cifra de 5.000 pasaxeiros rexistrada o pasado ano en coincidencia co Festival, segundo asegurou hoxe no transcurso da presentación en Ferrol dos novos servizos.

O 'tren buho' xurdiu da petición conxunta dos Concellos de Ferrol e de Ortigueira, para fomentar o transporte público e reducir a sinestralidade, ademais de facilitar o acceso ao Festival.

Ortigueira prevé recibir ata o domingo máis de 100.000 visitantes que, nunha importante porcentaxe, acamparán no piñeiral de Morouzos. Aínda que moitos dos visitantes non acoden aos concertos, o alcalde de Ortigueira, Rafael Girón, insistiu este xoves en que isto non desvirtúa o Festival.

"Afortunadamente, as 100.000 persoas que chegan a Ortigueira non van aos concertos, porque é unha vila de 2.000 habitantes, e se no concerto hai 30.000 persoas, xa é unha barbaridade", asegurou. En todo caso, matizou que aínda que "o Festival son os concertos nocturnos, cunha calidade notable que se mantén e se coida, tamén é a convivencia, a natureza, os concertos da mañá, os pasacalles, unha experiencia única e un evento máxico nunha paraxe única".