SANTIAGO DE COMPOSTELA, 2 Dic. (EUROPA PRESS) -
A campaña de vixilancia intensiva ás furgonetas realizada pola Dirección Xeral de Tráfico (DXT) durante a semana do 20 ao 26 de novembro en Galicia deixou un total de 1.606 denuncias en 17.492 controis. Esta campaña desenvolveuse con motivo do 'Black Friday' e o incremento do tráfico deste tipo de transportes.
Entre as principais infraccións, destacan o exceso de velocidade (661 denuncias), non pasar a ITV (251 denuncias) e circular con pneumáticos en mal estado (112 denuncias). Ademais, 96 condutores foron sancionados por consumo de alcol e drogas.
Por provincias, onde máis controis se realizaron foi en Lugo, con 7.908 dispositivos e 730 denuncias; seguido da Coruña, con 4.448 e 410, respectivamente; Ourense, con 3.038 e 239; e Pontevedra, 2.098 e 227.
Segundo datos da DXT, a celebración do 'Black Friday' fixo que se alcanzasen os 4,6 millóns de envíos diarios de mercadorías en España e, a inmensa maioría, neste tipo de vehículos.
Así, co obxectivo de comprobar diferentes aspectos relacionados coa seguridade viaria das furgonetas, a campaña estableceu puntos de control en todo tipo de estradas, especialmente en vías convencionais, así como en zonas próximas a polígonos industriais, zonas de carga e descarga, centros comerciais, etc.
A DXT advirte de que en 2022, aumentaron, con respecto ao ano anterior, tanto os sinistros de tráfico con vítimas nos que estiveron implicadas as furgonetas (7% máis), como as persoas falecidas neles (30% máis).
Tamén aumentou nun 20% o número de condutores denunciados por exceso de velocidade, a cal continúa sendo a infracción máis cometida, con máis de 302.000 denuncias.
Así mesmo, segundo se trasladou esta semana na Comisión Autonómica de Seguridade Viaria, faleceron en 2022 tres condutores de furgonetas nas estradas e dous deles non facían uso regulamentario do cinto de seguridade.
Andalucía
