Novagalicia elude pronunciarse sobre a posibilidade dun banco con entidades nacionalizadas e traballa no seu proxecto

SANTIAGO DE COMPOSTELA 24 May. (EUROPA PRESS) -

Novagalicia rexeitou facer comentarios sobre a posibilidade de que o Goberno opte por crear un banco público que aglutine as entidades nacionalizadas polo Estado, entre as que figuran BFA-Bankia, Catalunya Caixa e Novagalicia Banco. En calquera caso, fontes da entidade reiteraron que continúan traballando no seu proxecto propio.

O Ministerio de Economía estuda atrasar os procesos de poxa de Catalunya Caixa e, en caso de que esa fose a vía seguida para o banco galego, o de Novagalicia, á espera de coñecer as ofertas vinculantes que se presenten ao proceso de adxudicación da entidade catalá e que, de materializarse, serán moi axustadas. Así, segundo fontes financeiras, abriuse a outras vías, como a creación dunha entidade pública que reúna estes tres bancos.

Novagalicia Banco indicou que os seus responsables continúan centrados no seu plan de recapitalización e que traballan para dar entrada a investidores privados.

A entidade, como o resto do sistema español, debe remitir antes do 11 de xuño as medidas que tomará para cumprir cos saneamentos esixidos polo segundo decreto do sector financeiro do actual Goberno --o aprobado o pasado 11 de maio no Consello de Ministros--. No seu caso, supón un esforzo adicional de 1.109 millóns de euros.