O outono será en Galicia "máis cálido e máis seco do normal", segundo a Aemet

A CORUÑA, 17 Sep. (EUROPA PRESS) -

O outono será "máis cálido e máis seco do normal" en Galicia, segundo as previsións avanzadas polo delegado da Axencia Estatal de Meteoroloxía (Aemet) na Comunidade, Francisco Infante, en relación a outubro, novembro e decembro.

Respecto dos próximos días, sinalou que até este sábado, día 20, vivirase unha "situación de verán, practicamente" con "ceos pouco nubrados e temperaturas en aumento". "Máis altas que as propias desta época", concretou.

A fin de semana, engadiu, unha fronte "non moi activo" deixará precipitacións en toda Galicia e producirase un descenso das temperaturas con máximas por baixo dos valores normais. "A partir do martes é probable que volva o anticiclón", aventurou.

Foi nunha rolda de prensa convocada para facer balance da situación meteorolóxica. Nela, Infante expuxo estes aspectos após explicar que o verán foi "extremadamente cálido e moi seco ou extremadamente seco nalgunhas zonas de Galicia".

"O máis cálido desde 1961, con 2,2 graos por encima do valor normal", especificou para concretar que o mes de "xuño foi extremadamente cálido e xullo e agosto moi cálidos". En canto ás precipitacións, xuño e xullo foron moi secos e agosto, seco. "Só caeu un 45% da precipitación normal do trimestre", expuxo.

CLIMA EXTREMO EN ZONAS DE INCENDIOS

Segundo precisou, nestas áreas cun clima máis extremo é onde se produciron os incendios "máis importantes". Estas son o sueste de Galicia, a provincia de Ourense, o sur de Lugo e parte da provincia de Pontevedra.

"Levamos varios veráns con temperaturas por encima do normal, en concreto catro seguidos", lembrou para recalcar que o de 2025 foi "especialmente rechamante" e cun "déficit de precipitación moi importante".

Así, o mes de xuño foi "o máis calido da serie histórica en Galicia" e "moi seco" con "dous episodios importantes de calor"; entre o 17 e o 20 e do 27 e ao 1 de xullo. A temperatura máxima foi de 41,6 graos e alcanzouse en Ourense o día 30. Na mesma liña, xullo foi "moi caloroso pero sen chegar á definición de onda de calor" e "moi seco".

ONDA DE CALOR, EN AGOSTO

En canto a agosto, Infante destacou que foi "moi cálido", o segundo da serie histórica por detrás dese mesmo mes de 2003. "A onda de calor máis importante do verán produciuse entre o 3 e o 17 de agosto e é a máis longa rexistrada", sinalou para explicar que "non se alcanzaron temperaturas de marca pero foron moi altas durante moitos días". A máis elevada rexistrouse en Ribadavia (Ourense), o día 4 con "case 43 graos".

Respecto da primeira quincena do mes de setembro apuntou que foi "máis húmida e con máis frío do normal até o momento".

O balance do ano hidróloxico que finaliza o 1 de outubro, segundo o delegado de Aemet, presenta unha situación en toda España que está "bastante ben" cunha cantidade acumulada "ao redor dos valores normais ou por encima". En concreto, en Galicia é "normal" debido a que "vimos dun ano no que todas as estacións foron húmidas e compensou o déficit de precipitación do verán".