A plataforma de vítimas, sobre as desculpas de Garzón: "Haberá xente que lle perdoe e haberá xente que non"

   SANTIAGO DE COMPOSTELA, 6 Oct. (EUROPA PRESS) -

   O presidente da Plataforma de Vítimas Alvia 04155, Jesús Domínguez, valorou que o maquinista que manexaba o convoi "unha vez máis" pedise desculpas na súa declaración durante o xuízo polo accidente ocorrido na curva de Angrois (Santiago) o 24 de xullo de 2013.

   "Unha vez máis pediu perdón. Nós somos un colectivo con todo tipo de sensibilidades. Haberá xente que lle perdoe e haberá xente que non, é un tema que eu non podo valorar", recoñeceu Domínguez, en declaracións aos medios de comunicación ao finalizar a segunda xornada do xuízo, que se celebra na Cidade da Cultura da capital galega.

   Ao final da súa comparecencia ante a xuíza Elena Fernández Currás como un dos dous imputados, o maquinista volveu pedir desculpas. "Reitérome en que as vítimas me perdoen. Pero foi un accidente, non puiden evitalo", dixo.

   Sobre as cuestións técnicas das circunstancias do sinistro que explicou Garzón, o presidente da Plataforma de Vítimas destacou que "se demostra unha vez máis as présas que houbo por inaugurar a liña de alta velocidade".

   Así mesmo, Jesús Domínguez subliñou que a formación que recibiu Garzón para manexar o tren "foi pola vía 2, na que o semáforo estaba en amarelo" e na que "o accidente nunca ocorrería".

   Por isto mesmo, o exdirector de seguridade de Adif Andrés Cortabitarte permanece como o outro acusado e enfróntase tamén a catro anos de cárcere por 80 supostos delitos de homicidio, 145 de lesións e un de danos, por imprudencia profesional grave.

   Á súa saída do edificio xudicial, efectuada pola porta principal cun notorio reforzo do dispositivo de seguridade tras o golpe que lle propinou o pai dun dos falecidos o día anterior, Cortabitarte foi increpado polas vítimas con berros de "asasino" e "lercho". "Roubáchesnos a vida!", espetáronlle.