Pontón urxe un estudo sobre a perda de produtividade das rías: "Non quedará xente que vaia ao mar"

   SANTIAGO DE COMPOSTELA, 21 May. (EUROPA PRESS) -

   A portavoz nacional do BNG, Ana Pontón, reclamou un estudo sobre as causas da perda de produtividade das rías galegas e que se atendan "os problemas" que isto xera aos profesionais do sector que, augurou, "moitos tirarán a toalla e xa non quedará xente que vaia ao mar".

   Nunha visita este xoves á Confraría de Carral, en Vilagarcía, a líder nacionalista pediu que para ese estudo se conte coas universidades, con científicos e co sector, así como que "sirva de base para pór en marcha un plan ambicioso de rexeneración integral" das rías. "É posible facelo e é necesario, ademais dunha urxencia de país", subliñou.

   Nesta mesma liña, insistiu en que as administracións deben "atender ben os problemas" que xera esta falta de produtividade porque, lamentou, "moitos van tirar a toalla e xa non quedará xente que vaia ao mar".

   Así mesmo, tachou de "urxente" que o Goberno central aprobe as exencións e bonificacións nas cotas da seguridade social das mariscadoras con efecto retroactivo.

   Tamén reclamou pór en marcha "hatcheries públicas e mixtas" que garantan, apuntou, que haxa semente "suficiente, con trazabilidad e adaptada" ao medio.

   Doutra banda, lembrou a proposta do BNG de que se aprobe un protocolo sobre o baleirado de encoros que estipule que "non poidan baleirarse con marea baixa".