Pontón ve a Feijóo "cativo da estratexia de Casado" e ironiza coa "publicidade" que Ciudadanos lle fai ao BNG

SANTIAGO DE COMPOSTELA 1 Mar. (EUROPA PRESS) -

A portavoz nacional do BNG e candidata á Presidencia da Xunta, Ana Pontón, situou ao seu rival polo PPdeG, Alberto Núñez Feijóo, como "cativo da estratexia" do presidente do seu partido, Pablo Casado, e trasladou un agradecemento irónico a Ciudadanos pola "publicidade" que lle fai ao Bloque.

Nunha entrevista na Cadena Ser recollida por Europa Press, Ana Pontón criticou que Galicia contase nos últimos 11 anos cun "goberno cativo, primeiro de Rajoy, e agora da estratexia de Casado". "Por moito que tente parecer que marca distancias, ao final segue fiel a todas as directrices que lle marca o propio PP", reprochou a Feijóo.

"Hoxe mesmo vemos como vén o seu xefe de filas de Madrid a bendicilo. O grave é que sempre acaban actuando en función dos intereses de Madrid e non de Galicia", afirmou sobre o mitin conxunto que Feijóo e Casado deron este domingo en Ourense xunto con Mariano Rajoy, coincidindo co 11 aniversario da vitoria que devolveu a Xunta ao PP.

Sobre o discurso da portavoz de Ciudadanos no Congreso e candidata a presidir o partido, Inés Arrimadas, apelando a un pacto co PP para facer fronte aos nacionalistas nas urnas, Ana Pontón animou aos políticos do partido laranxa a seguir con esa campaña "cada vez máis disparatada", que na súa opinión demostra que "non coñecen a realidade" de Galicia e "tampouco coñecen ao BNG".

"Creo que aos galegos dálles un pouco a risa cando escoitan esas declaracións un pouco fóra de órbita de Arrimadas, que demostra que non coñece este país", afirmou a dirixente nacionalista, quen descartou que lle pasen factura ao Bloque as súas relacións con partidos como Bildu ou ERC. "Nunca o escondemos, somos nacionalistas", afirmou e agregou que "forma parte da normalidade e da lóxica" relacionarse con opcións políticas do mesmo espectro ideolóxico.

BNG "Á ALZA"

Para Ana Pontón, o BNG é "a forza política máis á alza" ante as eleccións do 5 de abril e por iso mostrouse "sorprendida" ante enquisas que dan un resultado sen 'horquillas' e ante as cales ten a "sensación" de que buscan "asentar a idea de que non vai ser posible o cambio".

"É xustamente o contrario. O que sinto na sociedade é que hai unha maioría social que quere cambio, que quere pasar páxina de 11 anos dun goberno do PP que foi inútil para defender Galicia, que nos deixa un país peor do que atopou", proclamou.

Ademais, defendeu que o BNG se presenta aos comicios para "gañar o partido" e argumentou: "que maior cambio que pór á fronte da Xunta a unha muller e que sexa do BNG". "Esa si que sería unha aposta case revolucionaria", exclamou.

Na súa opinión, "ninguén dubida" de que se o PP perde a maioría absoluta e non ten con quen pactar, haberá acordo entre as forzas de esquerda. "Non nolo perdoaría o país e sería unha tremenda irresponsabilidade", advertiu.

"Cremos que de pactos hai que falar unha vez que se expresen os cidadáns nas urnas, pero tamén dicimos con claridade que se o PP non ten maioría a partir do 5 de abril, favoreceremos que haxa un goberno que abra unha nova etapa", garantiu.