Rueda di que a opinión de Ayuso sobre Trump "non representa" a de PPdeG e censura a "demagoxia" de Sánchez

SANTIAGO DE COMPOSTELA 9 Mar. (EUROPA PRESS) -

O titular da Xunta e líder dos populares galegos, Alfonso Rueda, sostivo que a opinión da presidenta da Comunidade de Madrid, Isabel Díaz Ayuso, sobre Donald Trump "non presenta" a do PPdeG e censurou a "demagoxia" do xefe do Executivo estatal, Pedro Sánchez, sobre a guerra.

Así o trasladou ao ser preguntado na rolda de prensa posterior á reunión semanal do seu Goberno pola viaxe de Ayuso a Madrid nun contexto de crise diplomática con Estados Unidos pola posición do Goberno de España sobre o ataque a Irán.

Sobre este asunto, Rueda dixo que cando lle preguntan pola postura do PP, refírese "aos órganos" que "representan a todos", e sobre os que considera que non están a facer "seguidimismo" de Donald Trump, senón que están a actuar "con responsabilidade e sen incorrer nas demagoxias" do presidente Pedro Sánchez.

Dito isto, sostivo que sobre o que fan "persoas concretas", "terá que responder cada persona concreta". "Non tería moito sentido axuizar o que fan persoas determinadas que non nos representan a todos. Representan ao seu ámbito, desde logo non o que podamos pensar no Partido Popular de Galicia", afirmou.

Así mesmo, volve a tachar de "bravuconada" a ameaza de Trump a España, quen, ao seu xuízo, "non ten ningún dereito a ameazar así a un país soberano". "Non creo en absoluto que se estea facendo seguidismo de Trump dentro do meu partido. Está a manterse unha postura lóxica que creo que hai que manter neste momento", insistiu.

DECLARACIÓN INSTITUCIONAL NO PARLAMENTO DE GALICIA

Na rolda de prensa e preguntado sobre se o PPdeG está aberto a apoiar a declaración institucional que levarán tanto BNG como PSdeG ao pleno do Parlamento de Galicia que arrinca este martes, Rueda apelou a ver "o que se propón".

Neste punto, criticou que a actitude do Partido Socialista de Galicia pasa por "cumprir ordes" e "lexitimar calquera cousa que se lle ocorra a Pedro Sánchez".

Dito isto, incidiu en que "ningún" quere a guerra por "moitísimas razóns" primeiro humanitarias e despois polas súas repercusións económicas, pero asegurou que "España forma parte dunha serie de alianzas" e que "de nada serve tentar mandar eslóganes como fai Pedro Sánchez" e "ao mesmo tempo e por detrás" estar a facer "o que por diante se di que non fai".

Ademais, despois de aludir á restrición de liberdades que leva a cabo o Goberno de Irán, advertiu de que o feito de que este país "felicite" a España pola súa postura non parece "un bo síntoma".