O taller de Pontevedra rexistrado desvincúlase da trama de tráfico de vehículos, que segue aberta

   PONTEVEDRA, 16 Nov. (EUROPA PRESS) -

   O Taller Antonio Pintos, situado na parroquia de Mourente, en Pontevedra, que este martes foi rexistrado pola Policía Nacional, desvincúlase da trama internacional do tráfico ilícito de vehículos na que foron detidas un total de 20 persoas, tres delas en Galicia, e que segue aberta, segundo confirmou o delegado do Goberno, José Miñones.

   A través dunha publicación na súa conta de Facebook horas despois do rexistro, este negocio compromete "colaboración" ás autoridades españolas e portuguesas e asegura que os coches, adquiridos "a través dun provedor" en 2020, estaban "matriculados legalmente en España e, aparentemente, non ofrecían desconfianza de ningún tipo" sobre a súa orixe ilícita.

   "Nin a Xefatura de Tráfico en España nin tampouco os servizos oficiais das respectivas marcas alertaron de ningunha incidencia", engade esta publicación, asinada polo xerente do taller, Antonio Pintos Herves.

   Así, asegura que foi "posteriormente", após ser vendidos estes vehículos pola súa empresa a distintos particulares e outras compañías, cando "se descubriu que podían ser subtraídos" en Portugal.

   Con todo, este taller pontevedrés insiste en que todas as transaccións "están perfectamente documentadas con facturas de compra e de venda, realizáronse sempre mediante transferencia bancaria e figuran asentadas" na súa contabilidade.

   "Colaboramos coas autoridades españolas e portuguesas e así o seguiremos facendo en todo canto nos soliciten na medida das nosas posibilidades, porque somos os primeiros interesados en esclarecer esta investigación e conseguir descubrir os verdadeiros responsables dos posibles delitos cometidos. A actividade do noso taller segue como sempre e confiamos en que os nosos servizos non se vexan afectados por este desgraciado incidente", conclúe o xerente.

A OPERACIÓN "SEGUE ABERTA"

   Paralelamente, o delegado do Goberno en Galicia, a preguntas dos xornalistas respecto deste tema nunha rolda de prensa na Coruña, insistiu en que a operación "segue aberta en tres puntos que son Verín, Ourense e Pontevedra", con 20 detidos entre España e Portugal.

   "En España seguimos con esa cifra de tres detidos e polo momento non hai novidades respecto diso", puntualizou José Miñones.

   Así, lembrou que "sempre" se espera ao resultado final da operación para poder informar aos afectados da trama sobre a situación. "Imos ver exactamente o número de afectados que pode haber aquí en Galicia para trasladarlles o que teñan que facer a partir de aquí".

   Este martes, un amplo operativo no que participaban a Policía Nacional e a Judiciária de Portugal sorprendeu aos veciños do centro de Pontevedra. Os rexistros practicados afectaron non só á Boa Vila, entre eles o do taller de Mourente, senón tamén aos municipios de Ourense e Verín.

   Nesta operación investígase a unha rede criminal dedicada ao tráfico ilícito de vehículos, a quen tamén se lle imputa falsidade documental. Ao parecer, o grupo roubaba vehículos que, posteriormente, empregaba para sistemas de renting e venda a terceiros ou venda directa.