UU.AA. afirma que o concurso de Alimentos Lácteos "proba o abandono" da Xunta á gandaría

SANTIAGO DE COMPOSTELA 24 May. (EUROPA PRESS) -

Unións Agrarias (UU.AA.) afirma que o concurso de acredores en Alimentos Lácteos "proba o abandono" da Xunta á gandaría galega, e espera que esta medida "non supoña converter en reféns a case 1.000 gandeiros aos que se debe unha media de 20.000 euros".

O sindicato, nun comunicado, reclama "unha acción decidida" por parte da Xunta "para evitar o peche definitivo" da planta de Outeiro de Rei (Lugo). "Ata agora, o único esforzo realizado polo Goberno de Feijóo foi para poñerse de lado e non achegar ningunha solución para salvar un proxecto empresarial xerado, condicionado e guiado xa non só dende a Xunta, senón que ademais se someteu aos intereses do Partido Popular de Galicia", critica.

A organización que lidera Roberto García lamenta que o Executivo autonómico, "despois de romper no seu día o proxecto que integraba ás grandes cooperativas galegas por un cálculo unicamente partidista, dea as costas e se desentenda da sorte dunhas explotacións lácteas que se verán arrastradas na caída de Alimentos Lácteos".

Unións advirte de que o presidente galego "non pode faltar á súa palabra cos gandeiros, ao igual que parece que fixo na tramitación da Lei de cadea alimentaria, e debe reconducir unha sinatura na que se fixeron grandes investimentos para poñer no mercado marcas que agora perden potencial".