A Xunta estuda empregar a auga da antiga mina de Ventoxo, en Forcarei (Pontevedra), para abastecer ao Lérez

   PONTEVEDRA, 2 Ago. (EUROPA PRESS) -

   A Xunta avalía solucións alternativas para garantir "a curto prazo" as achegas de caudal ao Lérez. En concreto, unha das posibilidades que analiza é empregar a auga embalsada do antigo oco mineiro de Ventoxo, en Forcarei (Pontevedra), no caso de que "sexa de calidade e compatible coa actividade piscícola" do río.

   Para iso, Augas de Galicia --dependente da Consellería de Infraestruturas e Mobilidade-- procederá "nos próximos días" a realizar catas con extraccións de auga de distinta profundidade para confirmar que cumpre os requisitos para poder facer estas achegas ao Lérez, que abastece aos municipios de Pontevedra, Marín, Poio, Bueu e Sanxenxo, principalmente.

   Trátase, segundo informa a Xunta, dunha solución que "non sería de aplicación inmediata" pero, de ser viable, "si podería facilitar o abastecemento" a estes concellos "máis avanzado o verán", cando o caudal se podería resentir aínda máis pola ausencia de precipitacións.

   Así, no caso de que as análises demostren que a auga de Ventoxo é apta para o consumo humano e compatible coa vida no río, Augas de Galicia procedería a unha obra de emerxencia para transvasar a auga desde o oco mineiro até o Lérez.

RESPONDE ÁS PROPOSTAS DE PONTEVEDRA

   Precisamente, este luns, a directora deste organismo da Xunta, Teresa Gutiérrez, participou nunha reunión de seguimento da prealerta por seca, na que o Concello de Pontevedra fixo unha nova proposta de solución que ten como base diferentes presas existentes ao longo do río Lérez.

   No entanto, a Xunta asegura que a auga destas balsas "xa se están empregando actualmente para manter o caudal ecolóxico do río e para conseguir manter o seu caudal en valores estabilizados", da contorna de 1,7 metros cúbicos por segundo.

   Ademais, Augas de Galicia aclara que a medida de desembalsar máis auga e incrementar a saída das balsas por encima do caudal ecolóxico "o único que provocaría é que chegaría un momento en que, ao non haber novas achegas, non se podería garantir nin o mínimo do caudal ecolóxico nin o abastecemento á poboación e habería un risco certo de secar o río". De feito, isto invalidaría "completamente" a captación de Monteporreiro.

   A pesar de que os datos constatan unha "estabilización" tanto do caudal do Lérez como do consumo da auga nos últimos días, a Administración autonómica aínda fai un chamamento a "non baixar a garda, a non relaxarse" e a facer --tanto particulares como institucións públicas-- un "consumo responsable" evitando todo uso innecesario deste recurso.

NOVAS MEDIDAS EN SANXENXO

   Neste contexto, a Xunta pide aos concellos que "sigan incidindo nas medidas xa adoptadas" e implementen "outras novas", tras o cal puxo como exemplo a Sanxenxo.

   Este concello anunciou este martes o peche da piscina municipal e a supresión das regas nos campos de fútbol, dúas solucións coas que prevé un aforro medio diario de 23.000 litros.

   "O goberno lamenta os inconvenientes que poida provocar a decisión entre os usuarios das instalacións municipais, pero considera que son necesarias para seguir garantindo o abastecemento nas próximas semanas e evitar restricións de subministración a vivendas e negocios", sinala o Consistorio, que lembra que Sanxenxo chega a multiplicar até por seis a súa poboación en xullo e agosto.

BALANCE HIDROLÓXICO DE GALICIA

   Tamén este martes, o Ministerio para a Transición Ecolóxica e o Reto Demográfico fixo públicos os datos da reserva hídrica nacional. En base ás súas cifras, o conxunto dos encoros galegos están ao 53,4% da súa capacidade total, con 1.984 hectómetros cúbicos.

   Esta porcentaxe sitúase un 0,8% por baixo do da semana pasada --o quinto descenso consecutivo-- e case un 17% menos que a media da última década, situada en algo máis do 70%.

   No caso das presas da conca de Galicia Costa, están ao 63,5% de capacidade --1,1% menos que hai unha semana-- con 434 hectómetros cúbicos de auga embalsada; mentres que os da conca Miño-Sil están ao 51,2% --un 0,7% menos--, con 1.550 hectómetros cúbicos.