A Xunta pide ao Goberno eliminar a taxa de reposición en sanidade e servizos sociais

   SANTIAGO DE COMPOSTELA, 25 May. (EUROPA PRESS) -

   O conselleiro de Facenda, Valeriano Martínez, mantivo unha reunión telemática este luns coa ministra de Política Territorial, Carolina Darias, na que lle pediu eliminar a taxa de reposición en sanidade e servizos sociais --como persoal en centros de maiores e de discapacidade--.

   O conselleiro apunta que a eliminación da taxa de substitución no sector sanitario público permitiría ofrecer este ano 3.500 empregos nesta área. Tamén se empraza a quitar o requisito de antigüidade de tres anos para considerar un posto como elixible para a súa inclusión nos procesos públicos de estabilización do emprego.

   Logo do encontro, o Goberno galego explicou nun comunicado que o conselleiro tamén trasladou outras peticións como restituír a xubilación parcial para o persoal de servizo público, así como ampliar aos bombeiros forestais o réxime de xubilación do que xa gozan os bombeiros nas administracións públicas, o que permitiría reducir a súa idade de retiro.

   Xunto a isto, o conselleiro demandou que na repartición dos 16.000 millóns a comunidades ante o impacto do coronavirus se sigan os criterios xa empregados no sistema de financiamento autonómico. Tamén require o pago da mensualidade pendente do IVE de 2017.

REUNIÓNS DA MINISTRA CON CONSELLEIROS

   A ministra de Política Territorial e Función Pública, Carolina Darias, reuniuse por videoconferencia co conselleiro de Facenda, Valeriano Martínez, dentro da rolda de encontros que comezou con todos os conselleiros autonómicos con competencias en materia de Función Pública, para avanzar en asuntos comúns na xestión.

   Este foi un encontro bilateral antes de que se reúna a Conferencia Sectorial de Administracións Públicas que a ministra Carolina Darias convocará ao finalizar os contactos cos distintos conselleiros autonómicos.

   O Ministerio informa de que neste encontro abordáronse os plans de estabilización do emprego público de cara ao futuro, "xa que a extensión da pandemia e a actual situación sanitaria impediu seguir desenvolvendo os procesos de estabilización previstos e o impulso a novos proxectos para a mellora e estabilidade".

   Galicia conta con 147.902 empregadas e empregados públicos, dos que 93.368 (63,1%) son da Xunta, 27.527 (18,6%) das entidades locais e 27.007 (18,2%) da Administración Xeral do Estado.

   A maior parte do persoal pública de Galicia está integrado en sanidade (40,37%) e en educación (38,28%), é dicir, case oito de cada dez empregadas e empregados públicos perentencen aos servizos sanitarios ou do ensino.

   Na Administración Xeral do Estado, a ministra asinou o 4 de maio con sindicatos CSIF, UXT, CC.OO. e CIG o acordo sobre medidas para a reincorporación progresiva de empregados públicos, onde se avoga pola flexibilización de horarios e atención con cita previa, entre outros.