As metalúrxicas galegas exportaron produtos por valor de 49 millóns nos sete primeiros meses deste ano
VIGO, 23 Oct. (EUROPA PRESS) -
A Asociación de Industriais Metalúrxicos de Galicia (Asime) acudirá á Feira Internacional da Construción de Bolonia en colaboración coa Consellería de Innovación e Industria. A súa representación estará formada por 14 empresas industriais da ferralla e de construcións metálicas, e será a presenza de empresas da comunidade máis importante da historia do evento.
Segundo o presidente de Asime, José María Hidalgo, o obxectivo desta misión comercial é "incrementar a presenza das empresas galegas nos mercados internacionais da construción", intentando afondar na experiencia que xa posúen.
Así, o responsable de Asime considerou esta participación "especialmente importante nestes momentos, tendo en conta a ralentización que está a sufrir a construción en Galicia e en España".
A Feira Internacional da Construción de Bolonia está considerada a cita máis importante para os profesionais da arquitectura e a construción en Europa. Na edición de 2006, a SAIE (Soluzione Tecniche per L 'Architetura e Le Construzioni) rexistrou a visita de 176.500 profesionais.
A SAIE 2007 celebrarase do 24 ao 28 de Outubro e conta con 1.750 expositores en máis de 260.000 metros cadrados de exhibición.
EXPORTACIÓNS GALEGAS.
As exportacións galegas de produtos metálicos vinculados á construción alcanzaron os 61,2 millóns de euros, sendo Europa o principal destino, posto que aglutina o 65% do comercio exterior. Por países, Portugal, Alemaña, Francia e Italia son os principais clientes de produtos galegos feitos en metal.
En 2007, os datos dispoñibles ata xullo indican que estas operacións creceron un 59% respecto do mesmo período de 2006, máis de 49 millóns nos sete primeiros meses deste ano, fronte aos 31 millóns do ano pasado.
