SANTIAGO DE COMPOSTELA, 28 Abr. (EUROPA PRESS) -
Un foguete ruso que se desintegrou ao volver entrar na atmosfera despois de levar material á Estación Espacial Internacional foi avistado na madrugada deste martes desde distintos puntos de Galicia nos que o ceo estaba despexado.
Segundo informou a Europa Press o catedrático de Astronomía da Universidade de Santiago de Compostela (USC) e director do Observatorio Ramón Aller, trátase da reentrada á atmosfera dun foguete Soyuz que fora enviado a pasada semana desde Kazaxistán con subministración para a Estación Espacial Internacional.
O catedrático detallou que o episodio puido observarse ás 6,45 horas deste martes desde as localidades galegas nas que o ceo estaba despexado. "Na Coruña viuse pasar desde o nordeste até o suroeste, cara o océano, apuntou.
Segundo indicou, este tipo de foguetes quedan á deriva unha vez que completan a súa misión e "aos poucos van baixando" ata que se destrúen no momento no que se achegan ás capas baixas da atmosfera.
Docobo explica que este tipo de avistamentos "non son habituais" en Galicia e, de feito, o último caso similar de reentrada de foguetes produciuse en setembro do 2001.
O experto precisou que aínda que "estaba en previsión" a posible reentrada deste Soyuz, "este tipo de fenómenos" caracterízanse por ter "unha certa incerteza" na posición de caída.
"Igual que se viu aquí, podía producirse máis cara ao océano e, nese caso, xa non se vería", sinala o catedrático, que lembra que normalmente se programa para que "caian cara aos océanos".
NON IMPLICAN "PERIGO"
José Ángel Docobo sinalou que este tipo de sucesos non adoitan implicar "perigo" tendo en conta que os foguetes realízanse dun material que se destrúa co contacto na atmosfera.
Con todo, o catedrático de Astronomía da USC recoñece que si houbo casos no que o "material era moi pesado" e chegaron anacos a terra.
