SANTIAGO DE COMPOSTELA, 30 Ene. (EUROPA PRESS) -
O Consorcio Audiovisual de Galicia participará a partir de hoxe no XXI Mercado da Curtametraxe de Clermont-Ferrand, en Francia. Este é o terceiro ano consecutivo que Galicia participa neste encontro, que se desenvolverá ó longo de toda a semana, ata o 3 de febreiro.
Alí daranse cita todos os axentes implicados e interesados nestas obras audiovisuais: produtores, directores, distribuidores, canles de TV, que terán acceso a máis de 4.000 curtas de case 80 países.
O Consorcio Audiovisual de Galicia asistirá a este mercado co obxectivo de promover o catálogo 'Curtas 05'. Para elo, manterá reunións con distribuidores, canles de TV, programadores e en xeral todos os axentes implicados e interesados en difundir estas obras audiovisuais. Ademais, dará cobertura aos curtametraxistas galegos que queiran coñecer de cerca como funciona un mercado de curtas.
A presenza española no Clermont-Ferrand 06 está organizada por ICEX-FAPAE, ICAA e EGEDA, e ten como colaboradores a sete comunidades autónomas, entre elas a galega, representada polo Consorcio. Todos eles terán o seu emprazamento nunha caseta - paraugas.
Por outra banda, están previstas tres proxeccións profesionais de curtas españolas no mercado, ás que asisten compradores e distribuidores de todo o mundo. Este ano, no marco destas proxeccións, poderán verse dúas curtas galegas: Redondeo, de Ciudadano Frame, e Rosas de Mr. Misto Films, ámbalas dúas incluídas no catálogo 'Curtas 05'.
