Ana Cano pide a Educación y al Rectoráu que tomen una decisión sobre la especialidá de Filoloxía Asturiana

UVIÉU, 25 de Xunu (EUROPA PRESS)

La recién dimitida decana de Filoloxía, Ana Cano, considera que'l Rectoráu de la Universidá d'Uviéu y el Gobiernu del Principáu d'Asturies tienen de tomar "ya una decisión" sobre la necesidá de puesta en marcha de la especialidá d'asturianu na Facultá de Filoloxía.

La presidenta de l'Academia de la Llingua pronuncióse güei nesti sen en declaraciones a Europa Press, tres presentar la so dimisión ayeri, con motivu de l'aprobación d'una enmienda qu'eliminaba la llingua asturiana como especialidá dientro del 'maior' Llingües Modernes, que compondría'l titulu de grau de Filoloxía. Con 34 votos a favor y 30 a la escontra, la Xunta de la Facultá correxía la propuesta del Decanatu d'adautación de la Filoloxía al Espaciu Européu d'Enseñances Superiores.

Dende'l so puntu de vista, tanto'l conseyeru d'Educación, José Luis Iglesias Riopedre, como'l rector, Vicente Gotor, deben tomar parte nesti asuntu. "Vamos ver qué pasa col nuevu equipu, y qué decisiones tomen en rellación con esto'l nuevu rector y el conseyeru, porque en defintivia los títulos universitarios dependen del Principáu y el Rectoráu", afirmó Cano. Nesti sen, Cano recordó que les decisiones de la Xunta de Facultá "son democrátiques y deben ser respetaes, pero'l conseyeru y el rector tienen de analizar si realmente quieren una titulación d'asturianu o non, y les consecuencies qu'eso va tener".

RAZONES DE LA DECISIÓN.

Ana Cano nun atribyó a nengún factor concretu l'aprobación de la enmienda, cuando hasta agora la Xunta de la Facultá siempre apoyare la creación de la especialidá de Llingua Asturiana. "La xunta ta compuesta por unes persones que cambien y nunos momentos determinaos hai persones qu'asisten y otres que non", esplicó. Piensa amás que "si la votación se repitiera pasáu mañana nun hai nenguna seguranza de que'l resultáu fuera'l mesmu".

"Asina ye'l xuegu democráticu", añadió, dexando claro que "tol mundu sabía qué se diba votar, porque la propuesta y les enmiendes unviáronse a tolos componentes".

DECISIÓN "MUI GRAVE".

"Ye una decisión cola que yo nun pueo siguir como decana de nenguna de les maneres. Llaméntolo muncho, paezme mui grave, antiacadémicu, antiuniversitariu y anticientíficu que la Facultá de Filoloxía de la Universidá Asturiana evite que l'asturianu forme parte de la enseñanza reglada y que puea tar presente nes nueves titulaciones de grau, d'acordies col nuevu espaciu européu", afirmó.

Al so xuiciu, con esta decisión, "el problema de creación de Filoloxía Asturiana va siguir pendiente". Asegura amás que yera un tema "que taba mui bien encarriláu, porque yera una propuesta sumamente moderada, novedosa pa la Facultá y mui flexible pa los estudiantes, porque la elección dependía del alumnu, ya que nin siquier s'obligaba a naide a cursar asturianu".

La presidenta de l'Academia señaló que, de magar agora, nun se sabe qué va pasar cola enseñanza d'asturianu na Universidá y condicionó'l futuru de la materia a "lo que faiga'l nuevu equipu decanal". Esclarió, sicasí, que la decisión nun quier dicir que vaya desapaecer l'asignatura d'asturianu, tal y como s'imparte nesti momentu na Facultá, en calidá d'optativa.

PREOCUPACIÓN EN POLÍITICA LLINGÜÍSTICA.

Pela so parte, la directora xeneral de Política Llingüística, Consuelo Vega, en declaraciones a Europa Press, mostró la so preocupación por esta decisión, nel sen de que la mesma puea conllevar la "renuncia" per parte de la Universidá, "a liderar los estudios sobre la llingua asturiana y da-yos rigor académicu y científicu, porque me paez que ye'l sitiu ideal pa que dende ellí s'impulsen tolos análisis rellacionaos cola Filoloxía Asturiana".

Recordó amás que'l so llabor nel Principáu ye la promoción de la llingua y nesi sen destacó la "importate" lliteratura del idioma, con una historia que foi analizada en dellos estudios de la Universidá.

REAICIONES.

La decisión de la Xunta de Facultá foi criticada esta mañana por delles organizaciones, al traviés de los sos comunicaos. Una de les primeres en facelo foi la Xunta pola Defensa de la LLingua Asturiana, la cual entiende que "negar qu'haya una titulación d'Asturianu nos planes oficiales d'estudiu cuando sí l'hai d'otres llingües supón nega-y a la nuestra cualquier salida aceptable". Rellacionó amás l'aprobación de la enmienda cola "politización de dellos sectores universitarios que nun admiten la normalidá y que nel estudiu de les llingües minoritaries ven una amenaza pal so estatus personal".

El Conceyu Universitariu pol Asturianu (CUPA) entiende que detrás de la decisión hai unos "prexuicios acientíficos y ideolóxicos de cálter xacobín sobre la necesidá de que la Universidá d'Uvieu seya una Universidá de y pa la sociedá asturiana".

Por último, la formación política Unidá Nacionalista Asturiana condenó "enérxicamente un fechu que supón una auténtica ofensiva troglodita que tien como oxetivu la eliminación ensin mázcares nin matices, de la llingua y la cultura asturiana a traviés d'una vuelta a les cavernes del neofranquismu españolista".

Pal so voceru, Faustino Zapico, "ye gravísimo que'l votu de 34 persones que respuenden a intereses sectoriales y dacuando mercenarios, y en concreto de dos, Pedro Manuel Suárez y Félix Fernández de Castro, les dos persones que presentaron la propuesta, puean roba-yos a los asturianos y asturianes la posibilidá de cursar estudios na so llingua y torguen la formación del profesoráu de llingua asturiana, y más cuando hai años la Xunta Xeneral nel so conxuntu pidió espresamente por unanimidá l'entamu de los estudios de llingua asturiana na Facultá de Filoloxía".