Los asturianos ven la televisión una media de 190 minutos al día

MADRID/UVIÉU, 1 de Setiembre (EUROPA PRESS)

L'audiencia de les cadenes que nacieron cola Televisión Dixital Terrestre (TDT) sigue aumentando dende que se produxo l'apagón analóxicu en marzu y eso tradúxose n'agostu nun récor históricu mensual de consumu de televisión por esti sistema, el 78,8 por cientu.

Les rexones onde más tiempu se vio la televisión fueron Aragón (217 minutos per día), Andalucía (210 minutos), Canaries (206 minutos) y Baleares (204 minutos). Tres elles asítiense Cataluña (195 minutos), Valencia (193 minutos), Castiella-La Mancha (190 minutos) y Asturies (190 minutos).

Per contra, los territorios onde menos se vio la televisión fueron Galicia (177 minutos), Murcia (170 minutos), País Vascu (163 minutos) y Madrid (155 minutos).

Asina, esti mes algamaron récor d'audiencies cadenes como Clan TVE, Antena Neox, Antena Nova, FDF-T5, El Siete y Veo7, toes elles orixinaries de la TDT, según un estudiu ellaboráu por Barlovento Comunicación con datos de Kantar Media. Les nueves cadenes de TDT llanzaes a últimos d'agostu, Nitro y Marca TV, nun s'inclúin nesti trabayu.

El mes d'agostu foi tamién el de mayor consumu televisivu diariu con un aumentu de 10 minutos sobre'l mesmu periodu del añu pasáu. Concretamente, cada telespectador vio al día la televisión 189 minutos.

Mientres, el consumu de televisión per cable (15,5%) y satélite (5%) pierden sobre xunetu dos y trés décimes, respectivamente. Les autonomíes onde mayor implantación tien el cable son el País Vascu y Asturies, mientres que la mayor implantación del satélite dase n'Aragón.