Los bancos españoles ganen hasta xunu casi 8.000 millones

EP

MADRID, 1 de Setiembre (EUROPA PRESS)

Los grupos bancarios españoles zarraron el primer semestre del añu con un beneficiu atribuyíu de 7.979 millones d'euros, un 6,7% menos qu'hai un añu, en destinando a saniamientos 10.977 millones, un 10,3% más que nel mesmu periodu del 2009, y elevaron la so "sólida situación patrimonial", informó l'Asociación Española de Banca (AEB).

El balance consolidáu hasta xunu, con un activu total por importe de 2,26 billones d'euros, siguió creciendo a un ritmu del 5,5% añal.

A esti crecimientu contribuyó la subida de los depósitos de la vecería nun 14,3% añal, lo que supón 133.000 millones d'euros garraos fundamentalmente por filiales nel esterior, que tuvieron como contrapartida l'aumentu de los creitos nun 4,2% añal (57.000 millones d'euros más) y d'inversiones en títulos de renta fixa n'otros 38.000 millones d'euros (+14%).

L'AEB resaltó que l'atonía nos mercaos mayoristes de financiación reflexóse nun amenorgamientu, de sobre los 41.000 millones d'euros, nel saldu de los débitos representaos por valores negociables y pasivos subordinaos.

El patrimoniu netu contable siguió creciendo a tases añales superiores a les del balance, un 13,3% dende xunu del 2009, y el so pesu sobre'l total activu caltiénse penriba del 6%. En términos de solvencia, esto tradúxose nuna subida de los recursos Tier 1 y especialmente del core capital que s'asitiaba nel 8,39% al acabar del primer semestre de 2010, más de 100 puntos básicos penriba del llográu un añu antes.

La morosidá de la inversión creiticia quedó nel 4,2%, unos 80 puntos básicos más que la de xunu del 2009, mientres que los niveles de cobertoria caltiénense en sobre un 66% (69% un añu antes).