Bloque por Asturies denuncia qu'una telefonista del 112 negóse a atender a una señora porque falaba n'asturianu

UVIÉU, 18 de Payares (EUROPA PRESS)

Bloque por Asturies denunció güei qu'una telefonista del 112 negóse la selmana pasada a atender a una persona que llamaba pa pidir información, baxo l'argumentu de que nun la entendía porque falaba n'asturianu. La formación recoyó la quexa d'esta señora y unvió una carta de protesta a César Álvarez Avello, director del 112 Asturies.

Asina lo esplicaron güei fontes de la organización a Europa Press, tres facer pública la carta qu'unviaron al responsable del serviciu d'urxencies.

Según esplicaron les mesmes fontes, la señora en cuestión, yá mayor, llamó a esti númberu solicitando información sobre oposiciones pa esti órganu, tema nel que taba interesada la so fía. El Bloque asegura que la trabayadora que taba na centralita negóse a atendela porque, según dixo, "nun la entendía", una respuesta que se repitió varies veces mientres la usuaria intentaba comunicase per tolos medios n'asturianu.

Asina, les fontes del Bloque descartaron que la razón de la respuesta negativa fuere otra, como que ye un númeru d'usu esclusivu d'emerxencies, sinón que'l motivu foi que la solicitante espresábase n'asturianu.

Pal Bloque, esti fechu, según la carta unviada al 112, "grave de por sí, vulnera l'Estatutu d'Autonomía, la Llei d'Usu y Promoción del Asturianu y el Pactu de Gobiernu, amás de tolos convenios internacionales y derechos fundamentales de la persona, onde se recueye que nenguna persona pue ser discriminada pol usu de la llingua".

Tovía, segúna la formación, ye más grave si asocede nun serviciu como'l 112, "onde les persones tienen que tar capacitaes pa entender cualquier tipu d'incidencia, y más nesti casu porque, según la denunciante, la trabayadora a parte de nun facer nengún esfuerzu por entender a una ciudadana a la que-y correspuenden tolos derechos independientemente del idioma qu'use, nin siquier-y dio la posibilidá de comunicase con otra trabayadora que tuviere capacitada p'atendela".

El Bloque afirmó ser "consciente de la importancia que tien el 112 d'Asturies pa tola población a la hora d'asistir cualquier tipu d'incidencia, y de les circustanices de nerviosismu nes que munches veces se manden d'esti serviciu los usuarios". "Paezmos que la seguranza de les persones nun pue depender del caprichu de nengún trabayador a la hora d'intentar entender a un usuariu nun idioma que nun supón mayor problema de compresión", acabó la carta.