El censu d'oses con cría del 2010 confirma la recuperación de la especie n'Asturies

UVIÉU, 2 de Setiembre (EUROPA PRESS)

La Conseyería de Mediu Ambiente, Ordenación del Territoriu y Infraestructures ta desarrollando un censu añal d'oses con cría en dellos conceyos d'Asturies. Hasta'l momentu, y de forma provisional (puesto que podríen confirmase nuevos avistamientos) contabilizáronse 21 oses adultes con 43 críes, frente a los 18 exemplares y 31 críes rexistraes el pasáu añu. Esta cifra confirma l'enclín a l'alza de la población d'esta especie, según informó'l Gobiernu asturianu.

El trabayu fízolu la Patrulla Osu del Principáu d'Asturies, col apoyu de la Guardería de Mediu Natural de la Conseyería, la Fundación Osu Pardu, el Fondu pa la Protección de los Animales Salvaxes (FAPAS), y particulares qu'entregaron datos d'acolumbramientos, buelgues o rastros d'exemplares d'esta especie. Los datos de les zones estremeres de Lleón entrególos personal de la Xunta de Castiella y Lleón y tamién se contó cola collaboración de Sociedaes de Cazadores, como les de Proaza, Belmonte, Cangas y Ibias.

Los exemplares detectaos acolumbráronse n'ocho conceyos asturianos y trés estremeros de la provincia de Lleón. El grupu más numberosu atópase nel conceyu de Somiedu, onde se rexistraron 6 exemplares con trece críes. Tamién se censaron cinco oses con nueve críes nel conceyu de Cangas y una osa con dos críes en Degaña.

Ente los conceyos de Grau y Balmonte alcontróse una osa con dos esbardos; y ente Proaza y Quirós prodúxose un avistamientu con dos críes. A lo último, nel conceyu de Teberga, rexistróse una osa con cría.

Nel casu de los conceyos del territoriu de Lleón, los exemplares acolumbráronse en Páramo de Sil (una osa con una cría); nel conceyu de Caboalles (una osa con trés esbardos) y d'últimes nel conceyu de Palacios del Sil, onde se censaron cuatro oses con diez críes. Los recuentos realizaos confirmen un aumentu na proporción d'oses con trés críes y nel tamañu mediu de la camada.

El recuentu d'oses con cría empieza a realizase a mediaos del mes d'abril, época na que les oses empiecen a salir de los sos refuxos d'iviernu coles críes, yá nacíes nel mes de xineru.

Los censos d'osos con críes realícense utilizando un métodu aceptáu pal siguimientu de les poblaciones oseres. La llocalización de les oses realízase pente medies d'observaciones directes y pente medies de la llocalización de los sos rastros. Amás, l'usu de fotografíes y filmaciones facilita la diferenciación de los grupos familiares. El siguimientu realízase de forma coordinada ente tol personal que participa.